Hri kai 123 hmuh belin mi 102 enkawl dam an ni

Niminpiah khan Mizoram-ah COVID-19 hri kai hmuhchhuah pung ve leh hretin Sample enfiah 721 atangin hri kai 123 hmuh an ni a, Sample enfiah atanga chhutin za zela 17.06 te chuan hri an kai a ni.

Niminpiah a COVID-19 hri kai hmuhchhuah zingah mi 120 te hi Rapid Antigen Test hmanga Sample enfiah 677 atanga hri kai hmuhchhuah an ni a, District hrang hranga TrueNat Laboratory-ah Sample 17 enfiah niin hri kai mi 2 hmuhchhuah an ni bawk a, Fluorescent Immunoassay Test hmangin Sample 25 enfiah niin hri kai mi pakhat hmuhchhuah a ni. Heng bakah hian ZMC-a RT-PCR Laboratory-ah Sample 2 enfiah niin hri kai hmuhchhuah an awm lova, Lungleia- RT-PCR Laboratory-ah Sample enfiah a awm lo thung.

Nimin khan Mizoram-ah hri kai enkawl dam mi 102 awm lehin heti hian nimin tlai thleng khan Mizoram-a COVID-19 hri kai hmuh tawh chu 2,25,336 an ni a, an zinga 2,23,915 te chu enkawl dam ni tawhin hri kai hmuhchhuah atanga chhutin za zela 99.37 chu enkawl dam an ni tawh a, hri kai enkawllai 734 la awmin hri kai zingah mi 687 an boral tawh bawk a ni.

Tun dinhmunah District tinah hri kai enkawllai an la awm vek a, Lunglei District chu hri kai enkawllai tamna ber ni ve thungin enkawllai 179 an la awm a, Serchhip District in dawtin heng District pahnih chiah hi hri kai enkawllai mi za aia tam la awmna a ni a, hri kai enkawllai tlemna ber Lawngtlai District-ah mi 12 enkawl an la ni bawk.