'Hnam Inpumkhatna Bus' ah inrawnkhawmna nei

Tripura leh Mizoram inkara 'Hnam Inpumkhatna Bus' tlan tur chungchanga inrawnkhawmna chu nizan hmasa khan Eden Tourist Lodge, Vanghmun, Zampui, Tripura-ah neih a ni.

He inrawnkhawmna hi Mizoram sawrkar-a Transport Minister TJ. Lalnuntluanga hova neih niin Minister chuan an sawrkar tirh phat atangin Bus service turin an inbuatsaih tih a sawi a, “Hmun hrang hranga Zofate leh kan Jerusalem Aizawl inkar hi hnai se kan duh a ni. Harsatna hrang hrang karah chumi atan chuan theihtawp kan chhuah mek a, hmun hrang hranga nationalist-te kan phur tlang a, pheikhai rual taka ke penpui atan chhak, thlang, chhim, hmar-a Zofate kan sawm a. Kan Pathian zarah kan hlawhtling ngei ang tih kan ring tlat a ni,” tiin Zampui tlangdung-a Mizoram State Transport Bus tlan mai tura ruahman fel a ni chu lawmawm a tih thu a sawi a ni.

Transport Minister chuan Chief Minister Zoramthanga pawhin angaih pawimawh avangin Aizawl – Jampui MST Bus service tur pawh an lei thei tih sawiin, “Zofa, Zoram pawna mite hian ngaihsaktu in nei a, hmangaiha duhsaktu che u in nei a ni tih inhriat kan duh a. Zofa thendarha awmte tan he Pu Zoramthanga sawrkar hi a ding tlat zel dawn a ni,” a ti a. Zofate hi thendarh kan ni tih pawh sawiin, “Sawrkar hrang hrang hnuaiah kan awm a. Rorelna hran hnuaia kan awm avang hian unau hmel kan inhai ang tih hi a hlauhawm a, hmun hrang hrangah awm mah ila, sawrkar hran hnuaiah kan awm a nih pawhin unau kan ni tih hi i hre reng ang u,” a ti bawk.

He hunah hian Central YMA President R. Lalngheta bakah Lalnunmawia Pautu (MZP President), J. Lalmuanzuala (MSU President), L. Ramdinliana Renthlei (ZORO Thalai President), Lalrawntlinga Sailo (President Mizo Convention) leh Lalnunfima (President Tripura Group YMA President)-te pawhin thu an sawi a. Er. R. Lalrammawia, Director Transport Department chuan report pe bawkin Zampui tlang MST Bus service tur chunhchangah hian Zampui tlang NGO hrang hrangte chuan lawmawm an tih thu an sawi bawk a ni.