COVID-19 hri kai atangin 99.36% enkawl dam tawh

Mizoram-a COVID-19 hri kai hmuhchhuah atangin za zela 99. 36 te enkawl dam ni tawhin hri kai enkawllai 745 an la awm mek.

Inrinni khan Mizoram-ah Sample 437 enfiah niin heng atang hian hri kai mi 75 hmuh niin Sample enfiah atanga chhutin za zela 17.16 te chuan hri an kai a, hri kai hmuhchhuah mi 75 zinga 73 te hi Rapid Antigen Test hmanga Sample enfiah 426 atanga hri kai hmuh te niin Lunglei District-ah 23, Saitual District-ah 19, Aizawl District-ah 11, Serchhip leh Mamit District-ah mi 7 ve ve, Champhai District-ah 4 leh Kolasib leh Khawzawl District-ah hri kai mi pakhat ve ve hmuh an ni bawk. Heng bakah hian ZMC-a RT-PCR Laboratory-ah Sample enfiah 6 atangin hri kai mi pakhat hmuh a ni a, Fluorescent Immunoassay Test hmangin Serchhip District-ah Sample pakhat enfiahin hri kai mi pakhat hmuh a ni bawk a, TrueNat Laboratory-a Sample enfiah 2-ah hri kai hmuh an awm lo thung.

Zirtawpni khan Mizoram-ah Sample 533 enfiah niin hri kai mi 122 hmuh an ni bawk a, Sample enfiah atanga chhutin za zela 22.89 te chuan hri an kai a, hri kai hmuhchhuah zingah 120 te hi Rapid Antigen Test hmanga Sample enfiah 503 atanga hmuh niin Fluorescent Immunoassay Test hmangin hri kai mi pahnih hmuh ni bawkin RT-PCR Laboratory leh TrueNat Laboratory atangin hri kai hmuh belh an awmlo thung.

Inrinni khan Mizoram-ah COVID-19 hri kai enkawl dam mi 154 awm belhin nimin khan mi 31 te enkawl dam belh an ni leh bawk a, heti hian nimin tlai thlenga Mizoram-a COVID-19 hri kai hmuh tawh chu 2,25,533 niin an zinga 2,24,100 te chu enkawl dam an ni tawh a, hri kai hmuhchhuah atanga za zela 99.36 te enkawl dam ni tawhin hri kai enkawllai 745 an la awm a, hri kai zingah mi 688 te an boral tawh bawk a ni.