BUH NATNA

BUH NATNA

- R. Lalrinawma ADAO, Serchhip

Contact : 8131938465

Kan District chhunga buh chingtute zawng zawngte kumin ah buh tam tak thar theuh turin duhsakna chibai ka buk a che u. Kum danga harsatna kan tawh thin buh natna chungchang hi kan zirho leh dawn a, harsatna leh zawhfiah duh in neih chuan a chunga Phone No. tarlan ah khian inthlahrung hauh lovin engtik hunah pawh min rawn be thin turin ka sawm a che u.

Buh hian a tiah tirh atanga a hum a chan ni thlengin khawih chhetu rannung leh natna a nei nual mai. Chung zingah chuan Blast natna hi a lar ber leh loneitute hlohna thlentu lian ber a ni a, he natna hian a chi a nih atangin engtik hunah pawh a khawih chhe thei a ni.

A. NATNA HRIK CHUNGCHANG : He natna hi hmuar zing a mi Pyricularia Oryzae a ni a, Tur (toxin) Pyricularin siamchhuakin chu chuan buh cell a tichhiain a rau sen tuar thin.

B. NATNA LANCHHUAH DAN : Boruak lum leh hnawng a awm a, chhum leivak in buh hmun a tuam hian hun reilote chhungin buh ah hetiang hian natna a rawn lang chhuak thin:

(1) Leaf blast : Buh hnah-ah val uk a lo langchhuak a, hma sawn zelin boruak duhthusam a hmuh ve leh natna hrik chu rang taka inthlahpungin buh hnah a tuam chhuak a, a lo rau tuar thin. Ngaihthah chuan a bul lam panin a kung a thi/hmuih thin a,a hmun hmunin a thi ruap thin.

(2) Sheath blast : Buh kung tuamtu kawr-ah a lo val thliah thliah a, kar lovah darh zau zelin, a rau sen tuar thin. Hei pawh hi enkawl that loh chuan a kung chawpin a tihlum thei.

(3) Neck blast : Hei hi chu buh vui insiam tawh hnuah, a vui kengtu kuang-ah lo val chhuakin, buh vui a thlep thin a, a hum/fangah a kaiin a si dup thin.

C. VEN LAWK DAN : He natna hrik hi buh chi atanga inthlahchhawng chi a nih avangin : (a) natna in a khawih tawh buh hmun atangin a chi lak loh tur. (b) Buh chi tuh/kui hmain Carbendazim hmangin sawngbawl phawt tur a ni. (c) Buh hmun chu uluk taka vil a, a hnah a lo val sen thluah chuan Tricyclazole hmanga buh hnah kah vat tur a ni.

I buh hmunah rannung emaw, natna hrik inlar a awm chuan a rang thei ang berin District Agriculture Office, Serchhip-ah rawn report vat ang che.

BUH HI CHAW A NI A, CHAW CHU NUNNA A NI.