Serchhip-ah Gas buk tlinglo manin DC-ah hlan a ni

Serchhip-a Gas Agency pakhat, B. Lalnema Gas Agency (Bharti Gas)-a eirawngbawlna Gas lo thleng te chu Inrinni khan enfiah niin buk tlinglo bur 300 zet man a ni.

Thudawn danin Feb. 24, 2022 khan B. Lalnema Gas Agency-a eirawngbawlna Gas an kawl lai te chu enfiah niin buk tlinglo bur 9 man a lo ni tawh a, hetah hian eirawngbawlna Gas lo thleng te hi phai lam atanga an lakna lamah kg. 15 tur chu a buk tlinglo sa in an rawn thawn nia hriat a nih avangin Gas rawn thleng hi lo enfiah leh niin hetah hian Gas rawn thleng zawng zawng te hi a buk a tling lo vek tih hmuhchhuah niin Legal Metrology Enforcement Staff te chuan LPG Control Order 2000 Clause 5 angin an man a, a tul anga hma la turin District Bawrhsap hnenah Gas bur te leh a phurhna Motor hi hlan nghal a ni.

Serchhip District Consumers Association hruaitute chuan Mizoram-a Private Gas Agent te hian Lakshmi Gas Agency, Sonai Road Silchar an lak thin thu sawiin, Gas man sang zelah rate hi tihhniam sak turin Agent te hian an zuk ngen thin tih an sawi a. Lakshmi Gas Agency te hian Gas an lakna man hi tihhniam sak anga langin, amaherawh chu a buk tlinglo hian an rawn thawn ta thung nia an hriat thu leh kg. 15 turah kg. 13 chauh thunin, Gas bur-a kg. 15 anga inziak siin a Gas erawh kg. 13 chauh a ni ta niin an sawi a. Hemi chungchang hi Prime Minister hnenah pawh Online hmanga an thlen tawh thu an sawi bawk.