District Hospital thar sak tur chungchang ah NGO Coordination Committee in hmalak zel an tum

Serchhip NGO Coordination Committee chuan Serchhip District Hospital sakna tura an lo thlan tawh Bukpui ram-ah Serchhip District Hospital sak a nih theih nana hmalak dan tur chungchang nimin khan an sawiho.

Nimin-a Serchhip NGO Coordination Committee thutkhawm Serchhip Sub-Hqrs. YMA Meeting Room-a neih hi an Chairman Kawlthuama chuan kaihruaiin NGO Coordination Committee Secretary PC. Vanlalluna chuan Serchhip District Hospital sakna hmun chungchang ah hian District Bawrhsap kalchhuak ta Kumar Abhishek-a'n NGO Coordination Committee te hma la tura a tih anga tlawmngai pawl leh Joint VC bakah Town chhunga VC aiawhte September 16, 2020-a kalkhawm in District Hospital sakna atana Bukpui ram an thlan tawh hnuah CSR Fund cheng vbc. 21 vel hmuh mai tura beisei a nih tawh laia Assembly House-ah a hmun tur chianglo anga sawi a awm leh tak avanga hmalak dan tur ngaihtuah tura thutkhawm hi koh a ni tih a sawi a. Thutkhawm hmasa in a hmun tura an lo thlan tawh chu an dinna leh Hospital sakna atana an thlan ala ni reng tih a sawi bawk.

He Meeting-ah hian YMA, MHIP, MUP leh MZP aiawhte telin Serchhip District Hospital sakna tur chungchang ah hian P&E Minister chu remchang hmasa berah hmuin hemi chungchang hi ziakin a hnenah thlen nise an ti a. Helai ram-a compensation lak tum an awm nia sawi chungchang ah District Bawrhsap chu kawm nise an ti bawk.

Nimin-a thutkhawm ah hian Chhiahtlang South VC te pawh a bika tel tura sawm niin thusawina hun pek an ni a, Chhiahtlang South VC-a President R. Lalremchhunga chuan District Hospital atana NGO leh VC te kalkhawm in ram an ruahman tawh, Bukpui ram chu P&E Department ram a ni lo tih sawiin, kum 1980 chho vel khan P&E Department in inbun an tum avangin mi tam tak ten an ram an pek thu leh an zinga thenkhat chu hna leh pawisa te pawh pek an nih thu a sawi a. Amaherawh chu a hnua Surveyor te ruaiin helai ram hi P&E Department in teh ni mah se an ram pek ah hian an thawl avangin Land Lease siam sak turin VC ten NOC an ziah sak loh thu leh ITI Building pawh sak a nih tawh thu a sawi a. A ram chungchang ah chuan harsatna engmah awm lo tura an ngaih thu a sawi bawk.

He huna tel tura sawm dang Serchhip Thalai Pawl (STP) aiawhin an President Laldinpuia pawhin District Hospital chungchanga hma an lo lak tawhna te sawiin, STP chuan District Hospital thar sak thuai an duh thu leh a hmunhma thu ah erawh duh thlan bik an nei lo tih a sawi a, amaherawh chu khawtlang hruaitu rual kalkhawm ten a hmunhma atana an lo thlan tawh Bukpui ram chu an thlawp thu a sawi bawk.