Lok Adalat hmangin Serchhip-ah thubuai chi hrang hrang 38 chinfel a ni
Thubuai nei leh harsatna dang nei ten Court thleng kher lova thubuai an chinfel theihna tura ruahman Lok Adalat thutkhawm chu Inrinni khan Mizoram hmundangte rualin Serchhip-ah pawh neih a ni a, thubuai 38 chinfel niin Mizoram pumah thubuai 1084 chinfel a ni bawk.
National Legal Services Authority, New Delhi ruahmannaa tun tuma Serchhip-a Lok Adalat thutkhawm hi Serchhip District Court-ah neih niin Lok Adalat-a Presiding Officer Renee Lalremsiami MJS hovin Concilator ten Bench pahnih-ah thubuai lut te hi an ngaihtuah a, tun tumah hian Bank-a pawisa ba chungchang thubuai ngaihtuah chu a tam ber niin hemi kaihhnawih ah hian thubuai lut thar 59 leh a hmaa ngaihtuah tawh 5, a vaiin thubuai 64 ngaihtuah tura chhawpchhuah niin thubuai 29-ah inremna siam niin Rs. 32,80,104/- ah inremna siam a ni a. Heng bakah hian Civil case hrang 17 ngaihtuah ni bawkin heng te hi Case thar 14 leh a hmaa lo ngaihtuah tawh 3 te niin thubuai 9 chinfel a ni thung a, Rs. 92,040/- ah inremna siam a ni bawk. Heti hian tun tuma Lok Adalat neih ah hian thubuai 81 ngaihtuah niin thubuai 38 chingfelin inremna siam a ni a, thubuai hrang hrang ah hian Rs. 33,72,144/- ah inremna siam a ni.
Serchhip District-a Lok Adalat thutkhawm hmasa ber hi October 29, 2013 khan neih a ni a, hemi tum hian thubuai 6 ngaihtuah niin hemi hnu hian Lok Adalat thutkhawm hi neih chhoh deuh reng niin thubuai leh harsatna nei ten Lok Adalat-ah hian thubuai an neih te sawiin, inremna an neih theih nan hmalak thin a ni a, Lok Adalat rorelna ah hian sum senga Ukil rawih a ngaih ve loh avangin a pantute tan senso a awm ve lova, Rorel kalphung hi Law Court nen chuan dang daihin, thiamloh chang zawk pawh awm se, inhremna pek a ngai kher lova. Thiam chang zawk pawh inphah hniam tura ngen leh thiamloh chang zawk pawhin a tih diklohna te pawma inremna zawnpui kha Lok Adalat thiltum ber chu a ni a, Lok Adalat in thubuai a rempui tawh te inremna/Award hi rel thatsak turin India ram Court sang berah pawh appeal kalpui theih a ni lo bawk a ni.
Tun tuma National Lok Adalat-ah hian Mizoram State Legal Services Authority (SLSA) chuan ADR Centre Building sak thar, MINE-CO, Aizawl-ah thubuai ngaihtuahna buatsaihin helai hmunah hian Bench 9 a siam a, heng bakah hian High Court Legal Services Authority-ah Bench pakhat leh District hrang hrangah Bench 17 siam a ni bawk a, heng ah te hian thubuai chi hrang hrang 3705 ngaihtuah niin chung zinga thubuai 1084 chu chinfel a ni a, Pawisa chungchang thubuaiah pawh Rs. 9,84,57,087.28 zet inremna siam a ni.