Healthcare a bill tang ngaihthah-ah sawrkar puh

MPCC Media Cell chuan Mizoram-in Healthcare Scheme kan hman mek chu Congress sawrkar siamthat a ni tih sawiin, MNF sawrkar chu Health Care Scheme hnuaia bill tang ngaihthah-ah an puh.

MPCC Media Cell hian Inrinni khan an Chairman leh Congress Spokesman ni bawk Dr. Lallianchhunga hovin Aizawl Press Club-ah thuthar thehdarhtute an kawm a, he hunah hian Asian Development Bank atanga sum a hmuh cheng vbc. 117.80 leh MNF sawrkar Health Care sum hman bang, a vaiin cheng vbc. 149.6 chu kum 2010-11 atangin MSHCS sum bawmpui (Corpus Fund) atan dah a nih thu leh hemi sum peipun hna hi Finance Department kutah dahin, bank pali-ah pawisa hi dah a ni, an ti a. Healthcare ‘Sum Bawmpui’ (Corpus Fund) a sum dah pung hian dam lo bill pek thin niin Congress sawrkar lai khan tun anga harsat lian tham hi a awm ngai lo tih an sawi a, December 2018-a MNF sawrkar thar a pian khan Healthcare ‘Sum Bawmpui’-ah hian cheng vbc. 155 chuang a awm hman niin an sawi.

Congress sawrkarin Healthcare ‘Sum Bawmpui’ a siam hma chuan Healthcare sum cheng vbc. tam tak chu Bajaj Allianz-ah ‘Fortune Plus’ policy hnuaiah ‘Annual Premium’ anga dah a nih thu leh MSHCS pawh a nih tur angin a kal thei lova, dam lo bill tang pawh a tam thin hle a ni, an ti a. “December 2008-a Congress Ministry thar a pian pawh kum bithliah neia Bajaj Allianz-a Healthcare pawisa hi dah a nih avangin duh angin MSHCS kalphung tha lo kha a siamrem lawk thei bik lo a ni. Kalphung mumal awm lovin harsatna a thleng nasa hle a, kum 2010-2011 chhunga bill tang chu bill thehluh zawng zawng atanga 35% a tling hial a ni,” an ti.

MNF sawrkarin Mizoram State Healthcare Scheme hnuaiah damlo bill pek theih loh Rs. 59,63,40,278/- a nei mek nia sawiin, hei hi February 14, 2022 thlenga mi 23,031-te bill, sawrkarin a bat tlingkhawm a nih thu leh Financial Year kal lai mek 2021-2022 chhunga damlo te bill hi pek a la ni lo hrim hrim tih an sawi a, hei bakah hian kum 2020-2021 Financial Year a leiba kha nuai enngemawzat a awm bawk nia sawiin, “Damlo bill pek theih loh cheng vaibelchhe tam tak a awm chhan ber chu MNF sawrkarin health care tan pawisa a dah tam theih loh vang a ni,” an ti.

Congress Spokesman chuan MNF sawrkar chu a hlawhchham chiang hle ah an ngai tih pawh sawiin, Chief Minister Zoramthanga’n March 8, 2022-a Assembly House a hrilh danin MNF sawrkar hian Health-care hi ‘tlin lo chung chungin’ an kalpui a, “State dang hausa zawkte pawhin an kalpui theih loh Healthcare kan kalpui” a ti hial a ni, tiin hei hi thu dik tawk lo a nih thu an sawi bawk.