Fur ruahtui tlak hmain DTO Office leh Maxi Cab Terminal building sak zawh tumin hma la

Serchhip Darnam tlang-a District Transport Officer (DTO) Office leh Maxi Cab Terminal building sak mek chu kumin Fur ruahtui tlak hma ngeia zawh tuma hma an lak thu thawktute chuan an sawi.

Cheng nuai 240 vel senga Serchhip DTO Office leh Maxi Cab Terminal building sak mek hi nimin khan LENKAWL chuan a hmunah tlawhin hnathawktute chuan an hnathawh dinhmun leh harsatna an tawh te an lo sawi a, he building sak hna hi CB Construction, Aizawl chuan thawkin nikum hmasa (2020) November thla khan hna an thawk tan tih thawktute chuan an sawi a, a tira ruahman ang chuan he hna hi thla 12 chhunga zawhfel tur niin nikum November thla khan zawhfel tur a ni a. Amaherawh chu hnathawktute chuan hna an thawh hnuah running bill an lak mumal theihloh avanga harsatna an tawh thu leh kum khat vel an thawh hnuah tum khat running bill hi lain tunah hian bill hi lak leh an inbeisei mek thu an sawi a. Hei hi an la thei a nih chuan reilote ah hna hi thawh zawh theih an inbeisei thu sawiin, kumin Fur ruahtui tlak hma ngeiin rawng hnawih te nen zawh hman an inbeisei thu an sawi a ni. Hetianga running bill an lak theih loh avang hian an hnathawh mek hi huntiam chhungin thawk zo thei lo mah se sawrkar lam atangin zawhna an dawn loh thu leh anni lam pawhin hnathawh hun chhung pawtsei tura an dil loh thu an sawi bawk.

He hna thawktute chuan tunah hian hna thawh tur atanga za zela 70 vel thawk zo tawha an in ngaih thu pawh sawiin, a bang plaster, a chhuat phah, room pindan siam leh Electric wiring te chu an hna hmabak langsar zual a nih thu an sawi a, heng te hi Bill an la thei a nih chuan reilote chhunga zawh hman an inbeisei thu an sawi a. Hnathawktu mi 30 vel te nen hna hi thawk thin mah se Bill an lak theihloh avangin tunah hian mi 7 in an thawh mek thu pawh sawiin, Bill an la thei a nih chuan thawktu tam zawk nen hna hi thawh an tum thu an sawi a, hna an tan atangin chawlh nei lova an la thawh thu leh bungraw chungchang ah emaw pawh harsatna an neih loh thu an sawi a. Khawtlang mipuite tawiawmna ah lawmthu an sawi bawk a ni.

Serchhip Darnam tlang-a District Transport Officer (DTO) Office leh Maxi Cab Terminal building hi Mizopa chhiara chhawng li (4) ni tura ruahman a ni a, a hnuai berah Chokidar quarters awmin kawng an hnuai chiah ah Maxi Cab dinna hmun siam a ni dawn a, hetah hian a rualin Maxi Cab 16 vel ding thei tura ruahman a ni a, kawngpui an chu Motor Vehicle Inspector (MVI) Room leh Fee pekna hmun tura ruahman niin a chung ah DTO leh thawktu dang te an awm thung ang.