Chief Minister in remna leh muanna midang entawn theih tura langsar tak ni zel turin duh

Zonuna Kawlni (LENKAWL) • March 14, 2022 • Comments • Mizoram

Chief Minister Zoramthanga chuan remna leh muanna chu kan hnam nihna a bet tlat, midang pawhin an entawn theih tur langsar tak ni zel tura a duh thu a sawi.

Inrinni zing-a ZOHANDCO building, Chaltlang Lily Veng-a ZOHANDCO Sales Emporium a hawnna ah he thu hi sawiin Chief Minister chuan Hnam humhalh kawngah kan puantah leh thiamhnang dehtute kutchhuak chu chawilar thiam a pawimawh thu a sawi a. Culture hi a thangin a insiam danglam zel a, chu chuan kan hnam inthuam te, kan tawng te, thu leh hla, khawtlang nunphung, ei leh in te a keng tel vekin hnam puitling apiang an Culture a hausak thu a sawi a, “Kan nitin nunah kan hnam ziarang tilang theitu kan nunah bet tlat in, hnamdang pawhin an rawn hmuh theih a kan chawilar thiam pawimawh,” tiin hung zawng zawngah chuan langsar ber tura a duh chu remna leh muanna, remna siamtu nihna nise, a ti a. Remna leh muanna hi kan hnam nihna a bet tlat, midang pawhin an entawn theih tur langsar tak ni zel tura a duh thu a sawi a ni.

ZOHANDCO chu Corporation dang thenkhat nen economy lam thlira chhan tha tak takte avanga chawlhtir a nih hnuah hmabak tha tak nei nia hriat avang te, harsatna karah pawh tundin leh hram atana sawrkarin tha a tih avanga tundin leh a nih thu Chief Minister chuan a sawi a. Hnam thuamhnaw leh kutchhuak hrang hrang chawisanna atan leh puantah leh thiamhnang deh lama eizawngtute eizawnna tihhmasawn kawngah an pawimawh thu a sawi a. State in hma a sawn nan ei turah a intodelh hmasak a ngaih thu leh intodelh loh chuan chaklohna kan insiam ang bawkin heng kan hnam kutchhuak te hi kan humhalh a pawimawh thu a sawi bawk.

ZOHANDCO hi kum 2019 khan dinthar leh niin, tunah hian C. Lalrammawia chu Chairman niin Managing Director-ah Benjamin Lalzama a ni a, Board of Directors-ah mi 9 awmin Office-ah thawktu 19 an awm a. Kum 2019 atang khan activities hrang hrang neiin, chung zingah chuan puantah leh thiamhnangdeha eizawngtute eizawnna chawilar tura expo hrang hrang buatsaih te, seminar buatsaih te a tel a ni.