Chanchin thar lawrkhawm :
Kuhva rah hralh hnem tawh
Hachhek Bial chhung khaw hrang hrangte chuan nikum December 22 atanga kumin March 5 thleng khan Hachhek Bial Kuhva Chingtu Pawl (HBKCP) hriatpuina in kuhva bag 87,059 zet an hralhchhuak tawh tih an sawi a, Kuhva an hralhna rate hi a ngai reng lo tih sawiin, heng Kuhva hralhna atang hian Rs. 302,114,900/- an hmuchhuak tih an sawi a. Pathianni tihloh ni dang zawngah Kuhva hi tawlhchhuah reng a nih thu leh Fur kuhva rah tel lovin zaa 90 vel tawlh liam tawh anga an in ngaih thu an sawi bawk.
Kawng sial thar hawng
Siaha District chhung Laki leh Myanmar ram a Para khaw inkar kawng MADC sum hmanga sial thar chu Ningani khan MADC Chairman, H. Sialo chuan a hawng a, he kawng hi KM 20-a thui niin 407 Truck chin hnuailam kal theihna tur a ni.
Ramri hnaih ah inkahna thleng
Inrinni zing atang khan Myanmar ramchhung Mizoram hnaih, Rihkhawdar-ah sawrkar sipai te leh Chin PDF te nasa takin an inkap a, hei vang hian Inrinni khan Mizoram lamah raltlan mi 2000 chuang vel an rawn luh belh. Thudawn danin he inkahna ah hian sawrkar sipai lam mi 9 lai an thi a, PDF lamah thi an awm hriat a ni lo thung.
Session chhunzawm dawn
Mizoram Legislative Assembly Budget Session neih mek chu sawrkar Pisa chawlh a nih avanga ni 3 lai chawlhsan ve a nih hnuah Vawiin hian chhunzawm a ni leh dawn.
Pawngsualtu hrem ngei phut
Rajasthan lam mi Kendriya Vidyalaya, Tan-hril-a zirtirtu hnathawk Suresh Chandra Meena chu February ni 28, 2022 zan khan Aizawl-ah hmeichhe laka che mawi lova puh niin, Mizoram Police ten an man a, a lakah thubuai ziahluh a ni. He thil thleng chungchangah hian Mizoram Gorkha Youth Association (Central) leh Mizo-ram Gorkha Women Association (Central) hruaitute chu Inrinni khan an thukhawm a, “February ni 28, 2022 zan khan Gorkha hmeichhia pawngsual leh thaha vau a ni a, he thil thleng rapthlak taka mawhphurtu Suresh Chandra Meena, Dausa District, Rajasthan mi chu dan hnuaia a na thei ang bera hrem kan phut a ni,” an ti a. Bail a dilna pawh phalsak lo tura an ngen bakah a hna atanga suspend baka ban ngei turin Kendriya Vidya-laya Sangathan hotute an phut thu an sawi bawk.