Lirthei chesual-ah mi 2 thi

Inrinni chawhnu dar 3:00 vel khan Serchhip leh Keitum inkar-ah M/s ABCI Infrastructure Pvt. Ltd. Tanker pakhat chu chesualin mi 4 chuang zingah mi 2 an boral a, mi pakhat in hliam a tuar bawk.

Thudawn danin he Tanker (Compartment 5 awmna) hian State pawnlam atangin Diesel rawn phurin Serchhip leh Keitum inkar, Keitum thlen hma KM 2 vela hla Midum kham an tih mai thlen dawnah lirthei dang nena an inpel zo chu a ke hnunglam chu lei in zo lovin kawngthlang ah a inpaih liam a, Motor pawh hi liam zuiin kawngthlang ah meter 66 vel a lum a, Motor pawh hi a chhe hneh hle a, Diesel a phurh te pawh hi a putral vek nia thudawn a ni.

He Motor-ah hian mi 4 chuangin motor tlak hma hian Akash Singh (16) s/o Ranjit Singh, Silchar chu zuangthla hman in hliam engmah tuar lovin a chhuak a, Motor khalhtu Sagar Singh (26) s/o Arun Singh, Silchar pawh Motor hian vawrhchhuak vatin hliam tuarin Serchhip Damdawi In-ah enkawl a ni a, he Motor a chuang ve midang pahnih, Biswajit Singh (27) S/o Babu Singh, Cachar leh Bijoy Singh (24) s/o Sashi Kumar Singh, Dargarbond, Karimganj te erawh chetsualna hmunah hian an boral ve ve a, Keitum leh Serchhip-a mi tlawmngai ten an ruang hi la-chhuakin Keitum Branch YMA ten Kuang an siam sak hnuah Inrinni zan khan Serchhip dam-dawi In thlenpui an ni.

Vanduaina thlenna hmunah hian Serchhip Police te pawh thleng nghalin buaipui ngai ang ang te an buaipui nghal a, he vanduaina thlenga thi te ruang hi Serchhip damdawi In-ah nimin khan Postmortem niin buaipui ngai ang ang te buaipui a nih hnuah nimin tlai khan an khaw lam ah an ruang hi lak a ni.