Chanchin thar lawrkhawm :

Special Handloom Expo nei

Mizoram Apex Handloom & Cooperative Society Ltd. (MAHCO) leh sawrkar laipui-a Ministry of Textiles hnuaia Development Commissioner for Handlooms, New Delhi tangkawp in an buatsaih Champhai Special Handloom Expo chu nimin khan Champhai Vengthlang YMA Hall-ah neih tan a ni a, naktuk thleng neih a ni ang. Champhai Special Handloom Expo-ah hian dawr 30 hawn niin Mizoram hmun hrang hrang atanga puantah thiamte kutchhhuak incheina, hnam thuam hrang hrangte zawrhchhuah a ni. Mizoram Apex Handloom and Handicraft Cooperative Society Ltd. (MAHCO) hi kum 1977-a din niin thiamhnang deh leh puantah lama tuimite chawi-kanna leh phochhuahna tura din a ni a, Mizoram Society-te zinga upa ber pawl niin tun dinhmunah MAHCO hnuaiah Handloom Society 92 leh Individual member 75 te an inziaklut tawh a ni.

Eng chhit man ngaihtuah

Joint Electricity Regulatory Commission for Manipur and Mizoram hnuaia State Advisory Committee thutkhawm vawi 24-na chu nimin khan Aijal Club-ah JERC Chairperson R.Thanga hovin neih a ni a, he hunah hian Electric Department in chak zawka mipuite tan hna a thawh theih dan turte sawiho a nih bakah thingtlanga Streetlight changtlung zawk dah dan turte ngaihtuah a ni a. Kum 2022 atanga 2023 hun chhunga electric eng chhit man tur rawtna chi hrang hrangte sawiho niin Vawiin hian Public Hearing neiin Electric Tariff chungchanga Petition te ngaihthlak a ni ang.

LAD Park outsource tum

Local Administration Department (LAD) changtu Minister K. Lalrinliana chuan District hrang hranga LAD Park 11 te chu hneh taka enkawla mipui-a service tha tak pe tura Department mi leh sa indaihlohna avangin leh sum lakluh (revenue generate) tam zawk beiseina avangin Outsource tum a ni tih nimin a Assembly inkhawm ah MNF Member Zothantluanga zawhna chhangin a sawi.

Minister te demand sawiho

Mizoram Legislative Assembly thutkhawm nimin-a chhunzawm-ah Minister 3- Dr. R. Lalthangliana, Lalchhandama Ralte leh Robert Romawia Royte-te Department enkawlna tur sum ruahman chu sawiho a pawm a ni a, Dr. R. Lalthangliana enkawl Department tana sum ruahman hi a vaiin Rs. 10,49,04,18,000/- niin Lalchhandama Ralte Department enkawlna tura sum ruahman hi Rs. 15,3995,89,000/- niin Robert Romawia Royte enkawl Department te tana sum ruahman hi Rs. 40,50,17,000/- a ni a. Vawiin ah Minister 2 te Demand sawiho leh a ni ang.