Serchhip District-ah sawrkar kum kal mek chhungin Beng thalo mi 200 hmuhchhuah an ni
Sawrkar kum kal mek nikum (2021) April 1 atanga kumin January thla tawp thleng khan Serchhip District-ah Beng thalo mi 200 hmuhchhuah niin Mizoram District hrang hrang zingah mihring awm zat atanga chhutin Beng thalo hmuhchhuah tamna ber a ni.
He thu hi Vawiin March 3-a 'World Hearing Day' lo thleng tur puala Inkhawm nimin-a Serchhip District Hospital OPD Building-a neih ah tarlan a ni a, he hunah hian National Programme for Prevention and Control of Deafness (NPPCD) Serchhip District-a Audiometric Assistant PC. Lalbiakzuali chuan nikum April 1 atanga kumin January thla tawp thleng khan Serchhip District Hospital-ah ENT-a damlo inentir mi 1787 an awm thu leh heng zinga 748 te chu Beng lama harsatna nei niin heng atang hian Beng thalo mi 200 hmuhchhuah an ni tih sawiin, Mizoram-a damdawi In hrang hrangah inentir zat atanga chhutin Serchhip hi Aizawl dawt-a Beng tha lo hmuhchhuah tamna ber niin mihring cheng zat atanga chhut pawhin Beng thalo tamna ber pawl a nih thu a tarlang a. Hei vang hian kan Beng te a chhiat leh thatloh hun kher nghak lova a dinhmun enfiah ve reng a tul thu leh thla tin kan thei lo anih pawhin thla hnih (2) dan ah tal inentir a pawimawh thu a sawi a, hei bakah hian Beng tha lo ten an remchan ang Bengdar an lo vuah ve mai thin chu a nih dan tur a nih loh thu leh ri hriatna lama harsatna neih te sutkianna a ni lo tih a sawi a, Bengdar vuah tur ten mahni mamawh tawk ngei an vuah theih nan mithiam rawn hmasak a pawimawh thu a sawi bawk.
Serchhip District-a NPPCD Nodal District Nodal Officer Dr. Joseph Lalmuanpuia Hauzel kaihhruai he hunah hian Serchhip District Medical Superintendent Dr. ZD. Lalmuanawma pawhin 'World Hearing Day' puala hun hman hi mipuite pawhin an hlawkpui a beisei thu sawiin, Beng thalo chu rual min ti ban lo theitu a ni tih sawiin, hei vang hian kan Beng enkawl that a pawimawh thu leh kan duat a tul thu a sawi a, kan Beng a thatloh chuan kan nun pawh a nawmloh phah thei tih sawiin, Serchhip District Hospital-a OPD-a inentirna hun hawn rualin Beng lama harsatna neite tan inentir theih reng a nih thu a sawi bawk.
World Hearing Day pual hian tunkar Thawhtanni atang khan Serchhip District Hospital OPD-ah a mamawh te tan a thlawna Beng entirna hi buatsaih niin naktuk thleng neih a ni dawn a, kumin-a he ni thupui atan hian 'To hear for life, listen with care' tih chu hman a ni.