Mizoram-a hri kai hmuhchhuah tlahniam leh hret

Mizoram-ah COVID-19 hri kai hmuhchhuah an tlahniam hret hret zel a, niminpiah khan Mizoram-ah Sample 4024 enfiah niin heng atang hian hri kai mi 703 hmuh an ni a, Sample enfiah atanga za zela 17.47 ten hri an kai a ni.

Niminpiah khan ZMC-a RT-PCR Laboratory-ah Sample 232 enfiah niin heng atang hian hri kai mi 46 hmuh an ni leh a, Lunglei a RT-PCR Laboratory-ah Sample 32 enfiah niin hri kai mi 19 hmuh an ni bawk. Fluorescent Immunoassay Test hmangin Aizawl-ah Sample 46 enfiah niin hri kai mi 3 hmuh an ni a, Serchhip District-ah Sample 32 enfiah ni bawkin hri kai mi 11 hmuh an ni a, an vai hian Thenzawl a mi te an ni.

District hrang hranga TrueNat Laboratory-ah Sample 95 enfiah ni bawkin hri kai mi 21 hmuh an ni a, an zinga 13 te chu Mamit District a hri kai hmuhchhuah te niin Serchhip District-ah 4, Champhai District-ah 3 leh Saitual District-ah mi pakhat te an ni.

Rapid Antigen Test hmangin niminpiah khan Sample 3587 enfiah ni bawkin heng atang hian hri kai mi 603 hmuh an ni a, an zinga 170 te chu Aizawl District-a hri kai hmuhchhuah niin Mamit District-ah 86, Serchhip District-ah 77, Lunglei District-ah 63, Khawzawl District-ah 58, Saitual District-ah 45, Siaha District-ah 37, Champhai District-ah 24, Kolasib District-ah 22, Hnahthial District-ah 11 leh Lawngtlai District-ah hri kai mi 10 hmuh an ni bawk.

Heti hian nimin thlenga Mizoram-a hri kai hmuhchhuah tawh chu 2,15,356 niin nimin-a hri kai enkawl dam mi 1086 te nen mi 2,09,363 te enkawl dam an ni tawh a, hei hi hri kai hmuhchhuah tawh atanga chhutin za zela 97.22 niin hri kai enkawllai 5335 an la awm a, hri kai zingah mi 658 an boral tawh bawk a. Hri kai enkawllai tamna ber Aizawl District-ah 1590 enkawl mek an la ni a, enkawllai tlemna ber Siaha District-ah mi 132 enkawl mek an la ni bawk.