ASF vangin Mizoram-ah Vawk 33,417 thi tawh

AH & Vety Minister Dr. K. Beichhua chuan African Swine Fever (ASF) vangin Mizoram-ah Vawk 33,417 a thi tawh tih sawiin, tun dinhmunah chuan ASF hi thunun tawha ngaih a ni tih a sawi.

Nimin-a Assembly inkhawm ah ZPM Member, VL. Zaithanzama zawhna leh zawh belhna dangte chhangin Vety Minister Dr. K. Beichhua chuan ASF vanga Vawk 33,417 a thih bakah hian Vawk dang 10,910 chu suat a ni tih a sawi a. ASF vanga Mizoram-a Vawk thi zawng zawng hlut zawng hi cheng vbc. 60 leh nuai 82 chuang anga chhut a ni tih a sawi. Dr. K. Beichhua chuan, ASF vanga Vawk suatte chu nikum September ni 17 khan zangnadawmna pe turin amah ngeiin Central Sawrkar hnenah ziakin a thlen tih sawiin, December-ah a bawhzui leh a, an inbiakna ah hian an la ngaihtuah sak tur thuin tha takin an chhang zel a, January ni 7 khan a changtu Union Minister nen Guwahati-ah an sawi dun leh a, ziaka hriattir tura a tih angin hemi ni vek hian DO letter-in dilna a ziak, January ni 19-ah a channa an dawng a, zangnadawmna pe tura an dilna chu an lo en tur thu leh theihtawp an lo chhuah tur thu-a an la rawn chhang avangin Central-a zangnadawmkna dil chu beisei takin an thlir mek tih a sawi bawk.

Vawk suat te chu Central-in inkaihhruaina a siam angin hlawm hrang hrangah then a ni tih sawiin, an hlut zawng pawh a inang lo nual tih Dr. K. Beichhua chuan a sawi a. ASF vanga Vawk thi te State Disaster Management Response Authority hnenah Department-in zangnadawmna a dilah, Vawk pakhat chu Rs. 3000/- zel ni tura rawt a ni, a ti a. SEDP atangin zangnadawmna pek theih a nih leh nih loh chu sawi a la awm lo tih sawiin, SEDP hnuaiah hian Vawkvulh chu Pilot project anga kalpui niin, 1st leh 2nd instalment pek a ni tawh a, tun atanga reilote ah 3rd instalment pek theih beisei a ni tih Vety Minister chuan a sawi bawk.

(El-a)