Serchhip District-a hri kai hmuhchhuah mi sang ruk aiin tam tawh

Nimin khan Serchhip District-ah COVID-19 hri kai mi 56 hmuhchhuah belh leh an ni a, heti hian Serchhip District-a COVID-19 hri kai hmuh chu mi sang ruk aia tam tawhin hri kai enkawllai mi 271 zet an awm leh tawh bawk.

Nimin khan Serchhip District-ah Rapid Antigen Test hmangin Sample 214 enfiah niin hri kai mi 55 hmuh an ni a, Fluorescent Immunoassay Test hmangin Sample 4 enfiah niin hri kai mi pakhat hmuh a ni bawk. Nimin a hri kai hmuh te zinga 28 zet chu East Lungdar khua niin Sailulak khua ah hri kai 13 hmuh an ni bawk a, Serchhip-ah hri kai mi 11 hmuh ni bawkin Mualcheng khua ah hri kai mi 2 leh Thenzawl leh BSF-ah hri kai mi pakhat ve ve hmuh an ni bawk.

Nimin khan Serchhip District-ah hri kai mi 9 te chu anmahni enkawlna hmun atanga chhuahtir an ni ve leh a, heti hian nizan thleng khan Serchhip District-a hri kai hmuhchhuah tawh chu 6054 niin an zinga 5763 te chu enkawl dam an ni tawh a, hri kai te zinga za zela 95.19 te enkawl dam ni tawhin hri kai enkawllai 271 an awm mek a, hri kai zingah mi 20 an boral tawh bawk a ni.

Mizoram pumah niminpiah khan sample 650 enfiah niin hri kai mi 152 hmuhchhuah an ni a, Sample enfiah atangin za zela 23.40 ten hri an kai a, nimin khan hri kai mi 241 enkawl dam an ni leh thung a. Heti hian nimin tlai dar 5:00 thleng khan Mizoram a hri kai hmuhchhuah tawh chu 1,41,901 niin an zinga 1,39,864 te enkawl dam an ni tawh a, hri kai zinga za zela 98.56 te enkawl dam ni tawhin enkawllai mi 1489 an la awm mek a, hri kai zingah mi pahnih boral belh lehin hri kai mi 549 an boral tawh a ni.

Ramchhunga COVID-19 dinhmun thenkhat :

India ramah Covid chi thar, Omicron kai mi 1,700 hmuhchhuah a ni tawh a, heng zinga 639 chu an dam leh tawh a ni. State leh Union Territory 23-ah Omicron kai awm tawhin a tam berna Maharashtra-ah 510 hmuh a ni a, a dawttu Delhi-ah 35 hmuh a ni tawh bawk.

Darkar 24 kalta chhung khan ramchhung hmun hrang hrangah Covid hri kai thar 33,750 chuang an awm a, heng nen hian hri vei mek 1,45,582 an awm a ni. Union Health Ministry chuan hri kai zinga dam leh hi za zelah 98.20 a la ni reng tih a sawi a, hripui vanga thi 4,81,893 an awm tawh bawk a ni.

Kolkata damdawi In hrang hrangah darkar 24 kalta chhung khan Doctor 100 chuang Covid-19 hri kai hmuhchhuah a ni a, Health Department hotute sawi danin, Calcutta National Medical College & Hospital-ah doctor 70 vel hri kai an awm a, Chittaranjan Seva Sadan& Shishu Sadan Hospital-ah 24, Regional Institute of Ophthalmology-ah 12 an awm bawk.