Mizoram-a hri leng dinhmun thlirho a ni

Mizoram-a Covid dinhmun leh Covid variant thar 'Omicron' lo thleng thei thlirin nimin khan Health Minister Dr. R. Lalthangliana hovin Health Department-a mi pawimawh te chu an thukhawm.

He thutkhawm Secretariat Conference Hall-a neih ah hian Meeting hmasa lama thurel bawhzui dan te thlirlet a ni a, Contact tracing uluk leh nasa zawk a kalpui chungchang te, Containment Zone puan chungchang te sawiho niin, Central sawrkar atanga Omicron variant hmachhawn dan tur chungchanga hriattirna leh inkaihhruaina lo kalte thlirho a ni bawk. Sample test nasa zawka kalpui leh dan tur sawiho a ni a, Sub-Centre tinah RAgT Kit dah tura ruahmanna siam tha tih a ni. Thawktu lama harsatna awm thei te tarlan niin a rang lama chinfel dan kawng dap vat tum a ni.

He Meeting-ah hian tunhnaia Health Department-in hlawhtlinna a hmuhte tarlan a ni a. World Bank, NITI Aayog leh Ministry of Health & Family Welfare in kumtin an tihchhuah thin 'Healthy States, Progressive India, Reports on the Ranks of States and Union Territories, Health Index Round IV 2019-2020' kum 2021 kumtawp-a tihchhuah ah chuan State te zingah Mizoram chu pakhatna a ni. Mizoram chu ram pum state te zingah hian Overall leh Incremental ah pakhatna ve ve kan ni bawk.

Universal Health Coverage Day 2021 denchhena Consultation Workshop December ni 13, 2021 khan The Ashok Hotel, New Delhi-ah neih a ni a, 'Azaadi ka Amrit Mahotsav Campaign' neih meka India ram puma state hrang hrang tithate lawmman pek an ni bawk a. Mizoram chuan India ram States hrang hrang zinga 'Wellness Activities' ah lawmman pathumna a la a, Northeast atanga lawmman la thei awmchhun a ni.

Health Minister chuan heng hmalakna hrang hrangah Mizoram in kan titha chu thil lawmawm tak a nih thu tarlangin, thawktu zawng zawng inpekna leh thawhhona vang a nih thu leh theihtawp chhuah zel a tul thu a sawi. Meeting ah hian Minister chuan WHO atanga RT-PCR leh RAgT test kit cheng nuai 400 chuang man Mizoram in a dawng chu lawmawm a tih thu a sawi bawk.