Serchhip District-ah hri kai 938 enkawl mek an ni

Serchhip District-ah nimin tlai thleng khan hri kai enkawllai 938 zet an awm.

Tunhnai ah Serchhip District khaw hrang hrangah COVID-19 hri kai hmuhchhuah hi an pung nasa hle a, Inrinni khan Serchhip District-ah Rapid Antigen Test hmanga Sample enfiah 929 atangin hri kai mi 182 hmuhchhuah niin, an zinga 42 te chu Bungtlang khua an ni a, Hualtu khua ah hri kai 28 hmuh an ni bawk a, Hmuntha-ah 27, Sai-lulak-ah 21, Thenzawl-ah 20, Chhingchhip-ah 16, East Lungdar-ah 14, Piler-ah 9, Chhiah-tlang-ah 2 leh Serchhip-ah Veng pathum-ah hri kai pakhat theuh hmuh an ni.

Nizan-a he thu buatsaih lai thleng hian nimin-a hri kai hmuhchhuah zat hriat theih ala ni lova, nimin khan Serchhip District-ah mi 29 te enkawl dam ni thungin heti hian Serchhip District-a hri kai hmuhchhuah tawh chu 6862 niin an zinga 5904 te chu enkawl dam an ni tawh a, hri kai enkawllai 938 la awmin hri kai zingah mi 20 an boral tawh thung a ni. Serchhip District-a hri kai hmuh tawh zingah za zela 86.03 te enkawl dam an ni tawh a ni.