Latest News

RD Minister in sawrkar laipui a dawr

Sawrkar laipui hotute dawr-a New Delhi-a kal Rural Development Department Minister Lalruat-kima chuan niminpiah khan RD Ministry-a mi pawimawh te a kawm.

Rural Development Minister hian Dr. Biswajit Benerjee, Joint Secretary (Rurban), Ministry of Rural Development hmuin, Mizoram chhung RD Block hrang hrang hnuaia Rurban Cluster siam belh a nih theihna tura December, 2021 thla tir lama an inbiak tawhnaa an sawidun leh Secretary pawhin lo enzui a tiam chu chak zawka hma laksak turin a ngen a. Secretary hian Rurban Cluster siam belh tur hian hmalak mek a nih thu Minister hi hrilhin, Mizoram mai ni lo India ram pumpui anga uluk zawka ennawn a nih bakah mamawhna a zira pek tur a nih avangin Ministry pawhin fimkhur takin hma a lak thu a sawi a, Mizoram bik erawh Minister-in a ngenna anga tihhlawhtlin sak ngei a nih a beisei thu a hrilh bawk a ni.

Rural Development Minister Lalruatkima hian Rajesh Kumar Singh, Director, Department of Land Resources, Ministry of Rural Development chu a pisa-ah hmuin Mizoram mamawh leh hmachhawp engemawzat a thlen a, Department of Land Resources-a Joint Secretary, Umakant pawh hmuin Pradhan Mantri Krishi Sinchayee Yojana (PMKSY) Version thar 2.0, Rural Development Department, Govt. of Mizoram-in DPR a submit tawh chungchang a sawipui a. DPR siam tawh atanga Ministry in allocation a siam 45841 Hactare (Rs. 12,835.48 lakh) atana hmalakna tur chu tipung tura a ngenna chu Joint Secretary chuan a tul anga hma a lo lak tur thu Minister hi a hrilh a. Hei bakah hian Minister ngenna angin PMKSY Version 2.0 atana sum hman tur chu tun thla chhunga release an tum thu a hrilh bawk.

Comments

Popular News (Last 30 Days)