‘Mizomart e-Commerce Portal’ hman dan zirho

Mizoram-a thil tharchhuah hrang hrang zawrhna tur ‘Mizomart e-Commerce Portal’ chu siam thar niin Zirtawpni khan sumdawng mi engemaw zat te tan a hman dan zirhona neih a ni.

Information & Communication Technology Department hnuaia Mizoram State e-Governance Society (MSeCS) chuan Mizoram-a siam Handloom, Handicraft, Painting leh thiam thil dang te bakah Mizoram thil tharchhuah zawrhna atan hian ‘Mizomart e-Commerce Portal’ hi an siam a, Zirtawpni-a he Portal hman dan zirhona Aijal Club-a neih ah ICT Department-a Secretary Lalramsanga Sailo chuan COVID-19 vanga harsatna tawk sumdawng thenkhatte tan NEC-in sum a pek hmanga he Mizomart e-Commerce Portal hi ruahman a nih thu sawiin, Mizo siamchhuah leh kutchhuak ngei khawvel mipuite hmuha phochhuah leh zawrhchhuahna hun remchang a inhawng chu lawmawm a tih thu a sawi a ni.

ICT Department-a Secretary chuan IT based-a sumdawnna chu Mizorama sumdawng mimal leh pawl tam tak pawhin anmahni thiam ang angin an kalpui mek tawh tih sawiin, heng hi duhthusam chuan a zuartu tan leh a leitu tan ngei pawh a him tawk loh bakah sum sen tur a tam thin a, chuvangin MSeGS ten mumal zawka Portal an siam chu a himin a rintlak dawn bakah bungraw zuartu tan sum sen tur a awm dawn lo a ni, a ti bawk.