Mizoram-ah hri kai hmuhchhuah an la pung zel

Kum thar hnuah Mizoram-ah COVID-19 hri kai hmuhchhuah an la pung nasa viau a, nimin tlai thleng khan hri kai enkawllai pawh mi sang riat aiin an la tam a ni.

Inrinni khan Mizoram-ah Sample 4824 enfiah niin heng atang hian hri kai mi 875 hmuh leh niin Sample en atanga za zela 18.16 zetin hri an kai leh a, ZMC-a RT-PCR Laboratory-ah Aizawl District atanga Sample lak 400 enfiah niin heng atang hian hri kai mi 60 hmuh an ni a, Fluorescent Immunoassay Test hmangin Aizawl District-ah Sample 30 leh Serchhip District-ah 79, a vaiin Sample 109 enfiah niin hri kai mi 26 hmuh an ni a, an zinga mi 19 chu Serchhip District ami niin midang 7 hi Aizawl District ami te an ni thung.

District hrang hranga TrueNat Laboratory 8-ah Sample 267 enfiah niin heng atang hian hri kai mi 91 zet hmuh an ni bawk a, an zinga 35 te chu Mamit District ami te niin Lunglei District-ah 24, Champhai District-ah 13, Hnahthial District-ah 10, Serchhip District-ah 4, Aizawl leh Khawzawl District-ah mi pahnih ve ve leh Saitual District-ah hri kai mi pakhat hmuh an ni bawk.

Rapid Antigen Test hmangin Mizoram-ah Sample enfiah 4048 awm bawkin heng atang hian hri kai mi 698  hmuh an ni bawk a, Aizawl District-ah hri kai hmuhchhuah tam berin mi 339 zet hmuh an ni a, kan thenawm Sailam khua ah hri kai mi 60 zet hmuh an ni. Hnahthial District-ah hri kai mi 71 hmuh niin Lunglei District-ah 66, Khawzawl District-ah 49, Serchhip District-ah 39, Mamit District-ah 37, Saitual District-ah 31, Kolasib District-ah 25, Lawngtlai District-ah 21 leh Champhai District-ah 20 hmuh an ni bawk.

Inrinni khan Mizoram-ah hri kai mi 477 te enkawl dam niin nimin khan mi 722 te enkawl dam an ni ve leh bawk a, heti hian nimin tlai thleng khan Mizoram-a hri kai hmuhchhuah chu 1,52,255 niin an zinga 1,43,486 te chu enkawl dam an ni tawh a, hri kai hmuhchhuah atanga za zela 94.24 te enkawl dam ni tawhin hri kai enkawllai 8199 an la awm a, hri kai zingah mi 570 an boral tawh a ni.