Dikna rorelna ram ni turin ZPM in hmalak an tum

ZPM Legislature Party (ZLP) Deputy Leader Vanlalhlana chuan, “Dan rorelna ram, Mizo Kristian te chenna ni awm reng sawrkar din turin keini ZPM te chuan hma kan la zel dawn,” a ti.

Nimin a Kolasib Press Club-a thuthar thehdarhtute a kawmna ah he thu hi sawiin ZLP Deputy Leader Vanlalhlana chuan January 13, 2022 khan Mizoram nghawr dawtin sawrkar hnathawk Posting & Transfer a awm nia sawiin, he thil hi mipuiin mak an tiin an hrilhhai hle tih a sawi a. Kolasib DC Dr. H. Lalthlangliana chuan ramri buai te, COVID-19 dona ah te, Compensation chungchang ah te a hnathawh an lo hriat thu leh mipuite an thlamuang in rampum ah fak a hlawh nia an hriat thu a sawi a. Hetianga ramri humhalh kawnga hma a lak laia dan lova sumdawng daltu Champhai DC nena chawpchilh taka transfer an ni chu mak an ti hle tih a sawi a. “Sawrkar tha lo hnuaiah chuan dik tak leh tha taka thawktute an chep a, sawrkar kawng daltu leh hnawk an ni thin a. Mipuite aiin mi tlemte hlawkna ngaih pawimawh a ni thin. Mi tha leh dik te chu a tuartu an ni thin a, hetianga tuartu zingah hian an tel ta ni ah kan ngai a ni,” a ti.

Kan ramah hian sawrkar tha a piana Dan in awmzia a neih a, mipui ten kan dikna leh kan chanvo kan chan hun a nghahhlelhawm tawh hle tih sawiin, sawrkar tha hnuaiah chuan sawrkar hnathawk leh mipui kan zalen thin tih Vanlalhlana chuan a sawi a. “Vawiin ah hian mi tlemte hlawk tumna vanga mipuiin kan tuar thin hi pawi kan ti a, mipui thlamuanna ten harsatna an tawk hi hrehawm kan ti takzet a ni,” tiin hetiang hi a thlen tawh lohna turin sawrkar chu hma la tura an phut thu a sawi a, “Dan rorelna ram, Mizo Kristian te chenna ni awm reng sawrkar din turin keini ZPM te chuan hma kan la zel dawn,” a ti.