COVID-19 hri leng mek chungchangah CM hovin sawrkar leh khawtlang mi pawimawh inrawnkhawmna nei

Mizoram-ah COVID-19 hrikai an pun leh tak avangin leh Mizoram-ah Omicron variant lo lut mai thei dinhmuna a din avanga hmalak zel dan tur chungchangah nimin khan Chief Minister Zoramthanga hovin mi pawimawh hrang hrang ten inrawnkhawmna an nei.

He inrawnkhawmna Assembly Annexe Conference Hall-a neih ah hian sawrkar mi pawimawh te bakah Political Party hrang hrang aiawhte, NGO leh Kohhran aiawhte, MJA leh Zirlai pawl aiawhte, AMC, Local Council leh Village Council aiawhte, Hospital leh Medical Association aiawhte telin Chief Minister chuan COVID-19 hrilengin hun rei tak khawvel pum a tihbuai hnuah nunphung pangngaia let leh theih kan inbeisei laiin, tunah Omicron variant, variant awm tawh dang zawng aia inkaidarh awlsam a lo awm leh takah chuan ram changkang zawkte pawh inkharkhipin, India ram khawpui dangte pawh zan curfew leh inkhuahkhirhna hrang hrang an kalpui leh tak thu a sawi a. Mizoram-ah chuan kum hmasa lama sawrkar, Kohhran, NGO leh mipuite zinga thawhhona tha tak lo awm tawh avanga hrileng kan lo do tawh danah lawmthu sawiin, tunah pawh hian thawhhona tha tak nen he hrileng hi hmachhawn zui zel turin kalkhawmte leh mipui a sawm a. Sawrkar chuan a tih tur, tha nia a hriatte chu theihtawpa a tih zel tur thu sawiin, he inrawnkhawmnaa rawtna tha tak tak lutte chu Covid hri leng dona leh a laka invenhimna tura ruahmanna siam belh zelna tur atan a tangkai tur thu a sawi bawk.

He hunah hian Health Minister Dr. R. Lalthangliana chuan theihtawpin sawrkar chuan hri inkaidarh zel tur laka hma a lak zel tur thu leh, mipui tawiawmna a pawimawh thu a sawi a. Covid Appropriate Behaviour te tha tak zawm a tul thu te sawiin, Vaccine la thei, la la lo te chu la thuai turin a sawm bawk a. COVID-19 case a pun zel avanga lohtheihloh a inkhuahkhirhna siam belh a ngaih takah chuan heng SOP te hi mitin in tha takin zawm se, Lockdown pui pui kalpui ngai dinhmun kan thlen loh hram nan SOP zawm tha in, mitin Covid Appropriate Behaviour (Mask vuah that, kut tih fai ngun, midang nena inhlat a awm) te hi uluk zawka zawm a pawimawh thu sawi bawk.

He hunah hian rawtna lut hrang hrang zingah State pawn atanga lo lutte endik hna khauh taka kalpui te, COVID-19 SOP inrualkhai taka District tina kalpui te, tha zawka Mask vuah tura inzirtir leh, hrileng chungchanga mipui hriat tur leh inhrilhfiah ngai te inhrilhhriatna ngawrh zawka kalpui te, ngawrh zawka Test kalpui te a tel a ni. Tun Krismas leh kumthar vuakvetah symptom nei, in test si lo an awm chu hri kai punna chhan pakhat nia an rin thu Health Department hotute chuan an sawi bawk.