Chanchin Lawrkhawm :

Office dawr dil hmasak ngai

COVID-19 hri leng avangin Mizoram-a sawrkar Office dawr turte reng reng chuan January 17, 2022 atangin Online hmangin Office dawr dilna an thehluh hmasak a ngai dawn tih nimin khan Mizoram Chief Secretary Renu Sharma chuan thuchhuah siamin a tarlang a. Dilna hi Mobile app ‘Appointment’ tih Google Play-store atanga download in emaw, web portal https://appointment.mizoram.gov.in/ -ah emaw thehluh theih a ni ang. Administrative Departments leh Heads of Departments zawng zawng te an hnuaia Office hrang hrangte lo hrilh hre tur leh a tul anga lo bawhzui tura ngen an ni bawk.


LWA in kawng an zawh

Lawngtlai District chhung Lawngtlai West Assembly bial huamchhunga awm Nghalimlui khaw mi, Sadin Mela (41), Sushil Kumar-a nupui chu tun thla ni 6 khan a ram kal thi a hmuh a ni a, hetianga hmeichhe chunga thihna thleng duhlo hian nimin khan Nghalimlui Lai Women Association Branch chuan an khua ah kawng an zawh. Thudawn danin tun thla ni 6 Sadin Mela hi an khua atanga KM 4 vela hla, an Nul-a a kal chu a haw tak mai loh avangin khawtlangin an zawng a, zan dar 7:00 velah an Nul-ah hian a ruang hmuh niin mi kut tuar a thi ngei nia hriat a ni a. Vaseikai Police Station-ah FIR thehluh a ni a, Police ten thu zawhfiah atan mi hrang hrang ko tawhin an chhui zui mek a ni.


Hmunphiah lak phal turin ngen

Vairengte Aitlang hmuna ram neitute chuan nimin khan Aitlang hmuna inkulh Assam Police hotute hmuh tumin an hmu thei lova, hei vang hian Phone hmanga biain an hmunphiah te lak phalsak turin an ngen a, Assam Police hotute chuan thuneitu sang zawk atanga thu an hmu a nih loh chuan an ngenna hi a tihhlawhtlinsak theih loh tur thuin a chhang a ni. Ram neitute hian nimin vek khan Assam Police hotu in a chhan dan hi Vairengte SDO (C) hnenah thlenin SDO (C) hian Kolasib DC hnenah a hrilh chhawng ve leh nghal a ni.


Makeshift Hospital atan sum pe

Central Warehousing Corporation, Regional Office, Guwahati-a Regional Manager, Binay Chirania leh a thawhpui te chuan niminpiah khan Mamit DC Dr. Lalrozama IAS chu a chenna In-ah hmuin Covid damlo enkawlna, Makeshift Hospital sakna tur cheng nuai 10 an hlan a. Makeshift Hospital atan hian cheng nuai 20 ruahman niin Building sakna turin nuai 12 leh Makeshift Hospital hmanrua/bungraw lei nan nuai 8 ruahman a ni a, tun tuma an hlan hi 1st Instalment niin Mamit District chu District chawikan ngai anih angin Covid Care Centre sakna tura sum hi pe an nih thu an sawi a ni.


Kohhran hnenah Blanket hlan

Every Infant Matters, New Delhi te'n Lawng-tlai District chhunga chhungkaw khawsak harsa te tanpui nana kawmawl (blanket) 250 an rawn pek chu nimin khan Lawngtlai Bawrhsap Dr. Andrew H. Vanlaldika chuan Lawngtlai District chhunga Kohhran hrang hrang hruaitute hnenah an Kohhran chhunga a dawng tur thlan-chhuahte hnena an lo hlan chhawn atan a hlan a. Heng Blanket te hi tun thla ni 9 khan Lawng-tlai thlenpui niin Kohhran hrang hrang 10, Lairam Motherless Home leh a dang 5 hnenah a hlawma pekchhuah a ni.

Comments

Chhiar Hlawhte