Serchhip District-ah 4C tam zawk khar tawh

Serchhip District-ah COVID-19 hri kai enkawllai an tlem zel avangin Serchhip District-a khawtlang in an din hri kai te enkawlna hmun, Community Covid Care Centre (4C) tam zawk chu khar a ni tawh.

Kumin August thla hnu lamah Serchhip District khaw hrang hrangah COVID-19 hri kai hmuhchhuah nasa taka an pun avangin khaw hrang hrangah khawtlang in an din 4C hi siam belh mawlh mawlh a ni a, a hma lama lo din tawh te nen Serchhip District-ah hian 4C hi 33 zet din ni tawhin khaw thenkhat ah phei chuan pahnih leh a aia tam te pawh din a ni nghe nghe a. Amaherawh chu tunhnaiah COVID-19 hri kai hmuhchhuah leh enkawllai an tlem tak zel avangin heng 4C te hi tihtawp mek zel an ni a, tunah hian Serchhip District-ah 4C hman lai hi khaw 6-ah chiah a awm tawh a ni.

Serchhip District-a 4C la awm 6 te zinga hian Serchhip Town chhung ami chu pakhat chauh niin Chhiahtlang-ah 4C hi la awmin Serchhip leh New Serchhip area-ah a awm tawh lova, heng bakah hian Chhingchhip, Thentlang Sialhau, Leng leh Chekawn khua-ah 4C la awmin Leng khua ah hian 4C pahnih a awm a, Chekawn khuaa 4C hi kar hmasa a din thar kha a ni thung a ni.