Omicron hlauhawm leh hlauhawm loh la sawi theilo

State-Level Expert Team on COVID-19 Management-a Member Dr. PC. Lalramenga chuan COVID-19 hrik chhuak thar ‘Omicron’ chu tun dinhmunah a hlauhawm leh hlauhawm loh sawi theih a la ni lo tih a sawi.

Mipuite hnena thuchhuah a siamah Dr. PC. Lalramenga chuan COVID-19 hrik chhuak thar ‘Omicron’ chungchangah zawhna a tam thu tarlangin, he hrik thar hi zirchian mek a nih avangin a hlauhawm leh hlauhawm loh sawi theih a la ni lo tih swiin, “Kar hnih tal a tlem berah a hlauhawm leh hlauhawm loh hre turin hun a la duh a ni,” a ti a. He hrik thar hi thla kalta November ni 19 khan Africa khawmualpuia Botswana ram atanga South Africa-a damlo inentir tura kal mi pakhat atanga hmuhchhuah a nih thu a sawi a, mithiamten chawl lovin ni thum chhung COVID-19 positive tharte an zirchian hnuah virus hrik chhuak thar a ni tih an finfiah a, WHO hriattir nghalin WHO chuan Virus chhui zui ngai leh ngaihtuahawm (Variant of Concern) ah a puang zui a ni, a ti.

Dr. PC. Lalramenga chuan COVID-19 virus hmuhchuah tawhte aiin Omicron-ah hian Protein Spike (a hling rawn lawr chhuak) hi a letin a tam zawk avangin COVID-19 virus inkaichhawn awlsam ber, Delta variant ai hian inkaichhawn a awlsam hle dawn tih a sawi a, kar hnih liam ta chhung khan South Africa-ah hri kai thar a hma aia a let li a tam hmuhchhuah an ni hian chu chu a nemnghetin a lang, a ti a. Kum 2020 kum laihawl atang khan COVID-19 virus insiam danglam strain chi hrang hrang hmuhchhuah tan a ni a, WHO in chhui zui ngai leh ngaihtuahawm a tih bikte chu Alpha, Beta, Gamma, Delta leh Omicronte hi an ni a, tun dinhmunah khawvela COVID-19 hri kai zinga 99.8% hian Delta variant an kai a, hei hi omicron hian a luah lan thuai tura ngaih a ni, a ti bawk.

Nizan hmasa thleng khan ram 23-ah Omicron hi chhuichhuah tawh a nih thu sawi langin Dr. Ramenga chuan, India sawrkar leh Mizoram sawrkar pawh nasa takin he hrik hmachhawn tur hian a inbuatsaih a, State-Level Expert Team on COVID-19 Management chuan India ram pawn atanga lo lutte lo dawnsawn dan tur leh an zawm tur rawtna sawrkar ah a thlen tawh thu sawiin, reiloteah sawrkarin a tihchhuah an beisei thu a sawi bawk.

Dr. PC. Lalramenga chuan COVID-19 First Wave leh Second Wave kha hmun dang aiin kan dawng tlai tih sawiin, “Omicron pawh hi kan dawng a nih pawhin kan dawng tlai leh ngeiin a rinawm a, hmun dang boruak thlirin uluk taka lo inbuatsaih theihna hun kan neih a rinawm a ni,” a ti a. “He hrik laka in venna tha ber chu kan hriat tawhsa - hmai tuamna vuah uluk, kut silfai uluk leh midang hlata puipunna hmuna awm lohte hi a ni,” tiin sawrkar kaihhruaina zawm a pawimawh thu a sawi bawk.