MJA in lawmpuina hun hmang

India rama Civil mite chawimawina sang, Padma Shri Award dawngtu Lalbiakthanga Pachuau (Prominent Journalist) chu nimin khan MJA General Hqrs. chuan Aizawl Press Club-ah lawmpuina leh chawimawina hun an buatsaih a. He hunah hian MJA General Hqrs. President Zonunsanga Khiangte chuan Lalbiakthanga Pachuau chu chhan hrang hrang vangin chawimawina dawn phu a ni tih a sawi a. Journalist zingah hetiang chawimawina sang dawn awmchhun niin, a hnung zuitu kan awm leh angem tih pawh hriat loh a nih avangin MJA chuan a ngaihlu hle tih a sawi bawk.

He hun hi I&PR Director Lallianpuii leh I&PR Officer dang te pawhin hmanpuiin I&PR Director chuan Lalbiakthanga Pachuau-in Padma Shri a lakna Category chu ‘Journalism, Literature & Education’ tih ni mah se Social Work lama a hnathawh pawh Award dawnpui tham nia a hriat thu a sawi a. Journalism huang a tel chu a ti hlu lehzualtu a ni tiin, Mizoram chauh nilo kan chhehvel State-ah pawh hemi huanga dawng thei chu an tlem a rin thu a sawi bawk. He hunah hian MJA te hian Lalbiakthanga Pachuau hnenah hian lawmpuina thuziak leh pawisafai Rs. 10,000/- an hlan a ni.