Mizoram Governor in CADC hmunpui Chawngte (Kamalanagar) a tlawh

Mizoram Governor Dr. Hari Babu Kambhampati chuan nimin khan Chakma Autonomous District Council (CADC) hmunpui Chawngte (Kamalanagar) a tlawh a. Amah lawmna hun buatsaih ah Governor chuan hmasawnna kawngah ramchhung hmun dang nen khaikhina ADC huamchhunga mite an hnufual bik thin chu pawi a tih thu a sawi.

Mizoram Governor hian Helicopter hmanga Chawngte hi thlengin Tuichawng bialtu MLA Dr. BD. Chakma, Lawngtlai District Bawrhsap Dr. Andrew H. Vanlaldika, CADC Chief Executive Member (CEM) Rasik Mohan Chakma, Lawngtlai Superintendent of Police (SP) DKS. Singh leh Official dangte'n an lo dawngsawng a. CADC Rest House tual-a amah lawmna inkhawm buatsaihah Larsap Dr. Hari Babu Kambhampati chuan Lawngtlai District chhunga Sub-Division pakhat leh CADC hmunpui Chawngte tlawh theia a awm chu lawmawm a tih thu a sawi a. Hmasawnna kawngah ramchhung hmun dang nen khaikhina ADC huamchhunga mite an hnufual bik thin chu pawi a tih thu sawiin, State sawrkar leh District Council hnuai thawktu zawng zawng chu ram bial leh a mi chengte hmasawn nana theihtawp chhuah chu an mawhphurhna a ni tih hre thar leh turin a chah a. Autonomous District Council chungchanga India Danpuiin Governor kova mawhphurhna a nghahte chu tha taka hlen chhuah a tum thu sawiin, mipuite hamthat nan District Administration leh District Council te chu inlungrual taka thawkho tura a duh thu a sawi bawk.

Governor lawmna hun hi Lawngtlai Bawrhsap Dr. Andrew H. Vanlaldika chuan kaihruaiin Larsap hi amah lo lawm nan CADC hmingin Chakma hnam thuam leh District Administration hmingin Lai puan hlan a ni a. CADC CEM Rasik Mohan Chakma chuan inlawmna thu sawiin, CADC dinhmun tlangpui a tarlang a. CADC-a Art & Culture Department hnuaia Chakma Cultural Troupe te'n Hnam lam an entir bawk a ni.

Larsap lawmna inkhawm hman zawh hian CADC Rest House Conference Hall-ah State sawrkar leh CADC hnuaia Department hotute nena inkawmna neiin, Chawngte Sub-Division dinhmun tlangpui Bawrhsap in tarlangin, ven-himna chungchang SP ten an tarlang a. Tlawmngai pawl hruaitute, Kohhran hruaitute, Political party hrang hrang hruaitute leh CADC-a Member-te nen inkawmhona hun buatsaih chhunzawm niin hemi hnu hian Chawngte Community Health Centre tlawhin, an dinhmun a en a. Tlai lamah Aizawl a pan leh nghal a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar