Zirlai pawl kan nih angin Zirna kan ngai pawimawh ber ang - President, MZP General Hqrs.

Mizo Zirlai Pawl (MZP) General Hqrs. hruaitu kalchhuak tur leh hruaitu thar te chuan nimin khan mawhphurhna inhlanin MZP President thar Lalnunmawia chuan, “MZP term tharah chuan Zirlai pawl kan nih angin Zirna kan ngaipawimawh ber ang,” a ti.

MZP General Headquarters hian tun thla ni 4-a kum 2021-2023 chhunga hruaitu tur thlanna an neih hnuah nimin khan Aizawl-a MZP Pisapui-ah mawhphurhna an inhlan a, he hunah hian an President thar Lalnunmawia chuan, “MZP term tharah chuan Zirlai pawl kan nih angin Zirna kan ngaipawimawh ber ang,” tiin NIOS hnuaia thil diklo tam tak awmte chhuichian a, siamtha tura hmalak a nih tur thu a sawi a. Scholarship 2nd Installment Mizoram sawrkar in a dawn tawh, tun thlenga zirlaiten an la dawng lo chu hriatthiam har a tih thu sawiin, “Sum awm tawhsa tun thlenga Zirlaite kut ala thlenglo chu a chhan leh avang MZP in a tul anga chhuichiangin a bawhzui nghal dawn a. Zirlaiten an dikna chanvo an chan theih nan hmalak a ni ang,” a ti bawk.

MZP President chuan Mizote mamawh em em All India Service leh Central Service-ah Mizo thalai a tam thei ang ber an luh theih nan MZP in UPSC Pattern Exam a buatsaih tur thu pawh sawiin, “A titha mi pathum thlang chhuakin, chung mi pathumte enkawl nan MZP in mi inphalte hnenah Sponsorship a zawnsak ang. Mizo hming hawha hnamdang sumdawngte dapchhuah a nih dawn bakah, tihtawp a nih theih nan ke kan pen ang. Mizoram chhunga hmasawnna hnathawk hrang hrang- Telecom, kawng siam leh hna dang thawkten a nih dan tur ang tak hna an thawk theih nan enzui an ni ang. Tuikuk leh Takam ten Mizoram chhunga harsatna an siam fo pawh enzui a a ni ang a, dan lova Mizoram chhunga lo pêmlut te pawh theih ang anga dodal a ni ang,” a ti bawk.

Tunhnaia Mizoram chhung, Inner Line Reserve Forest Area 509 Sq. Miles a Assam lam duhtawka an chet laia Mizoram Chief Secretary in Status Quo maintain tura order a siam pawh pawi an tih thu MZP President chuan sawiin, “A tul angin MZP in kan enzui zel ang,” a ti a. Tuirial Constituency Bye-Election neih zawh takah Tripura chhunga awm Tuikuk te vote thlak tir tumna a awm chu engti kawng maha pawm zam theih a nih loh thu leh MZP in an dodal zel tur thu a sawi bawk.

MZP General Hqrs. hian tun thla ni 4 khan Assembly neiin hruaitu thlanna hi an nei a, President-ah Lalnunmawia Pautu, Vice President-ah Andrew F. Lalramnghaka, General Secretary-ah Jacob Lalmuanpuia, Asst. General Secretary-ah Chinkhanmanga Thomte, Treasurer-ah Sanghmingthanga leh Finance Secretary-ah Lalhuapliana“ te thlan an ni.

Comments

Popular News (Last 30 Days)

Serchhip DCSO sawn a ni