Auro Scholar Programme hawnna neih a ni

Mizoram sawrkar-a School Education Department, Samagra Shiksha leh Sri Aurobindo Society ten thawhdunna Auro Scholar Programme leh Creation of Role Model School chu nimin khan School Education Secretary Dr. Lalzirmawia Chhangte chuan a hawng.

School Education Department Secretary Office-a hemi puala hun hman ah hian School Education Secretary Dr. Lalzirmawia Chhangte chuan Sri Aurobindo Society te nen thawhdunna programme tha tak an hawng thei ta chu lawmawm a tih thu a sawi a. Sri Aurobindo Society te leh SSA Mizoram chuan March 12, 2018 khan Zero Investment Innovations for Education Initiatives (ZIIEI) chu an lo ziak tawh tih sawiin, Zero Investment Innovations Programme-ah hian Lalhmachhuana, SPD Samagra pawhin Certificate of Honour a lo dawng tawh tih a sawi a. Auro Scholar programme atana Mizoram thlan a ni chu lawmawm a tih thu a sawi bawk.

School Education Secretary hian Creation of Role Model School chu hawng nghalin hei hi 'Pathshaala App' tih a ni a, zirtirtuten anmahni duhdan mila nuam taka naupangte an zirtirna tura puitu a ni dawn a ni. He App atan hian School 26 thlanchhuah a ni dawn a, heng programme te hi Mizo naupangten an hlawkpui ngei a beisei thu a sawi bawk.

Auro Scholar Programme hawn tak hi Covid-19 avanga naupangte zirna khaihlak loh nana School Education leh Aurobindo Society te thawhdunna a ni a. He programme hmang hian naupangten Micro Scholarship Quiz an chhang ang a, thlatin naupangte chawk phur thei turin lawmman pawh siam a ni dawn a ni. He programme hi zirtirtuten an hriatthiam theih nan Online Session te pawh neih a ni dawn a, Zirtirtuten naupangte online hmang bawkin an hrilhfiah ve leh dawn a ni. Auro Scholar hi naupangte chawhphur nana thla tina lawmman siam a khawvela Micro Scholarship Programme hmasa ber a ni a. Kum 2019-a duan chhuah a ni.

Nimin-a he hun hman kaihruaitu Lalhmachhuana, SPD Samagra chuan he programme hawn tak hmang hian naupangten zirna an thiam leh thiam loh online-in an test ang a, an thiam dan a zirin sScholarship an dawng thei dawn a, amaherawhchu Scholarship hi he programme tum ber a ni lova, nitin-a an zir ennawn lehna atan kori a tu dawn a, hei hi a pawimawh lai zawk chu a ni, a ti a. Class I-XII thleng a huam theih dawn thu a sawi bawk. He hunah hian India ram State hrang hrang 36-ah leh UT-ah te he programme hi an lo kalpui tawh thu tarlan niin Mizoram-ah he programme an kalpui thei tur chu lawmawm a tih thu Sri Aurobindo Society lam chuan an sawi a. He programme hian zirtirtute chu zirtir tur chhawpchhuah sak leh zirlaite an zirlaia chak lo deuhte a pui thei dawn niin aan sawi bawk.