UD&PA in Bawlhhlawh khawn dan an ti danglam

Serchhip khawpui chhunga UD&PA Department in mipuite bawlhhlawh an lakkhawm dan chu tih danglam leh a ni.

Serchhip khawpui a UD&PA Department in bawlhhlawh an lak-khawm ah hian tun thla ni 1 atang khan chawlkar tin bawlhhlawh tawih thei, tawih theilo leh mihring tana hlauhawm te chu a inchhawk a lak-khawm tura tih a ni a, amaherawh chu mipuite phurrit chhawkna atan hei hi tih danglam a ni tih Serchhip DUDO Dr. Albert Vanlalliantluanga chuan sawiin, tawih thei leh tawih theilo te hi a hranga dahin, tawih thei chu puan hring-a tawn phuiin tawih theilo chu a sen-a tawn phui tur a ni tih a sawi a. Heng te hi a ruala khawnin Dumping Ground-ah thliar a nih dawn thu leh bawlh-hlawh thliar chauh an khawn tur thu a sawi.

Serchhip khawpui bawlhhlawh paihna, Serchhip leh Keitum inkar ami chu tunhnai khan siam danglam niin Gate-a luha dinglam (Serchhip lam)-ah tawih theilo paihna siam a ni a, Keitum lam ep-ah tawih thei paihna siamin a lai-ah mihring tana hlauhawm paihna siam a ni bawk a. Tawih thei paihna hi leitha siamna atan hman nghal turin ruahmanna siam mek a ni bawk.