Thawhtanni-ah hri kai hmuhchhuah an pung hret

Thawhtanni khan Mizoram-ah COVID-19 hri kai hmuhchhuah an pung leh hret a, Sample enfiah 6501 atangin hri kai mi 830 hmuh niin Sample enfiah atanga za zela 13.99 te chuan hri an kai a ni.

Thawhtanni khan ZMC-a RT-PCR Laboratory-ah Sample 764 enfiah niin heng atang hian hri kai mi 185 hmuhchhuah an ni a, an vai hian Aizawl District-a Sample lak vek niin hri kai hmuhchhuah tamna ber Sakawrdai-ah hri kai mi 61 hmuh an ni a, a dang zawng hi Veng leh khua 35 atanga hri kai hmuh te an ni. Hei bakah hian Aizawl-ah Fluorescent Immunoassay Test hmanga Sample enfiah 74 atangin hri kai mi 14 hmuh ni bawkin an vai hian Aizawl khawpui chhung ami te an ni.

District hrang hranga TrueNat Laboratory zingah Hnahthial tihloh District dang zawngah Sample enfiah niin Sample enfiah 421 atangin hri kai mi 66 hmuh an ni bawk a, Champhai District-ah 19, Lunglei District-ah 18, Serchhip District-ah 15, Lawngtlai District-ah 9, Kolasib District-ah 2 leh Aizawl, Siaha leh Mamit District-ah hri kai mi pakhat theuh hmuh an ni.

Rapid Antigen Test hmangin Mizoram-ah Sample 5242 enfiah ni bawkin heng atang hian COVID-19 hri kai mi 565 hmuhchhuah an ni bawk a, an zinga 267 te chu Aizawl District-a hri kai hmuhchhuah niin Lunglei District-ah 63, Siaha District-ah 60, Champhai District-ah 56, Serchhip District-ah 48, Lawngtlai District-ah 22, Kolasib District-ah 20, Saitual District-ah 17 leh Khawzawl District-ah hri kai mi 12 hmuh an ni bawk.

Nimin khan tlai dar 5:00 thlengin Mizoram-a hri kai zingah mi 420 enkawl dam an awm belh leh a, heti hian nimin tlai dar 5:00 thlenga Mizoram-a hri kai hmuhchhuah chu 1,22,354 niin an zinga 1,15,855 te chu enkawl dam ni tawhin hri kai hmuhchhuah atanga zaa 94.69 te chu enkawl dam an ni tawh a, hri kai enkawllai 6064 an la awm a ni. Nizan hmasa khan Mizoram-a hri kai zingah mi pakhat boral awm belh lehin nimin khan hriat theih chinah hri kai boral mi pakhat a awm belh leh a, heti hian Mizoram-a hri kai zingah mi 436 an boral tawh a ni.