Sawrkar in Petrol leh Diesel-a Chhiah lak tihniamin Mizoram-ah tuialhthei man tihhniam a ni

Sawrkar laipui in Petrol leh Diesel atanga Chhiah a lak thin a tihhniam avang leh Mizoram sawrkar in hemi-a Value Added Tax (VAT) a lak a tihhniam ve avangin Mizoram-ah tuialhthei man tihtlawm a ni a, Serchhip-ah pawh nimin khan tuialhthei man hi tihhniam nghal a ni.

Sawrkar laipui chuan nimin atang khan ramchhunga Petrol leh Diesel atanga Chhiah a lak, Central Excise Duty chu tihniamin Petrol litre khat zelah Rs. 5/- leh Diesel-ah Rs. 10/- in a tihniam a. Hemi rual hian State Sawrkar ten Petrol leh Diesel atanga VAT (Value Added Tax) an lak pawh mipui phurrit chhawk zangkhai tura tihniam turin a ngen bawk a ni. Sawrkar laipui hian COVID-19 avanga Chhiah dan hmuh a tlem avangin nikum lam khan Central Excise Duty a lak hi a lo tipung tawh a, State sawrkar te pawhin VAT an lak hi tipungin tuialthei man hi a san phah nasa hle a. Tuna Chhiah lak a tihhniam leh tak avang hian sawrkar Chhiah hmuh tur hi cheng vbc. nuai khat velin a tlakhniam rin a ni.

Hetianga sawrkar laipui in Central Excise Duty a lak tihhniam hnu nimin khan Mizoram sawrkar pawhin a hma lama Chief Minister in a lo puan tawh angin Tuialthei atanga VAT a lak chu a tihniam ve nghal a, sawrkar thuchhuah in a tarlan danin MVAT Act, 2005 hnuaiah hian Diesel atanga chhiah lak 14.5% ni mek chu 5.23%-ah leh Petrol atanga Chhiah lak 25% chu 16.36%-ah a tihniam a, hei hian Petrol leh Diesel hi litre khat zelah Rs. 7/- ve ve in a tihniam a, he rate thar hi nimin atang khan hman nghal a ni bawk.

Hetianga Tuialhthei atanga Chhiah lak tihhniam a nih hnu hian Serchhip-ah chuan Petrol litre khat man chu Rs. 102.14 niin XP chu litre khat zelah Rs. 105.78 a ni a, Diesel pawh litre khat zelah Rs. 87.13 a ni a. Serchhip District chhunga Petrol Pump neitu hrang hrangte chuan tuialhthei dahkhawl sa an neih te chu sawrkar in Chhiah a lak tawhna vek a ni tih sawiin, hetianga rate thar anga a man tlawm an hralh leh tak avang hian sum tam tak an hloh pawh dawn nia a lan thu an sawi a, tuialhthei dahkhawl sa ngah apiang chu sum hloh nasa tur nia a lan thu an sawi bawk.

Tun dinhmunah PB. Lalzuithanga FS Serchhip-ah Petrol litre 12,000; Diesel litre 11,000 leh XP litre 900 awmin R. Lallura FS, Thenzawl ah Petrol litre 10,000 leh Diesel litre 16,000 a awm a, Thenzawl-a Mizofed FS-ah Petrol leh Diesel litre sing hnih vel ve ve a awm bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man