Lunglei Sub-Hqrs. YMA leh NGO ten Vawiin thleng sawrkar an ngaichang dawn

Lunglei Sub-Hqrs. YMA leh NGO hrang hrang kalkhawm chuan Chhimbial mipui te tana RT-PCR khawl bun chungchangah Vawiin, Nov. 5, 2021 thlenga sawrkar atanga thu an hmulo anih chuan Total Bandh hmanga lungawilohna lantir an tum tih an sawi.

Lunglei Sub-Hqrs.YMA hian an Vice President K. Lalfakzuala kaihhruaiin hmalak an tum zel dan hi nimin khan thuthar thehdarhtute an hrilh a, Lalfakzuala chuan COVID-19 hripui a len avangin nunphung a buai a, tunah phei chuan a hri hmuhchhuahna khawl RT-PCR chu mitinin an rilru in an en thuap a ni ber tawh a, hei hi hman ve theih ngei duhna a lian hle a ni, a ti a. YMA pawh in fimkhur takin a thlir a, mahse loh theihlohna avangin inrawlh a ngai ta tih sawiin, All NGO te nen rorel in Sub-Hqrs.YMA SEC in October thla chhung ngei a he khawl hman anih ngei theih nan a thutlukna a lo siam tawh chu Mizoram Sawrkar-ah thlen a ni a, mahse October thla a zo a, khawl ber hman a theih tak si lovah chuan sawrkar au eih turin NGO te chuan ruahmanna an siam ta a ni, a ti.

Ruahmanna an siam dan chuan Vawiin, Zirtawpni thleng Sawrkar ngaihchan nise, chhanna rintlak a awm loh chuan Inrinni-ah All NGO Meeting neih nise, hetah hian Total Bandh huaihawt dan tur ruahman a ni tawh ang tih a sawi a. YMA chuan Total Bndh hi huaihawt loh hram a duh a, tun dinhmunah chuan lohtheihlohna in a nawr ta nia sawiin, he an hmalakna turah hian Political Party tin te lo inthiarfihlim se an duh tih a sawi bawk.

Tun dinhmunah RT-PCR khawl dah lailawkna tur Zotlang Tourist Lodge ami chu sak zawh tawh niin hripui leng karah October thla chhung a an zo hman chu a satu te chungah pawh YMA chu a lawm hle tih a sawi a. Lunglei Thalai Pawl leh RT-PCR for Chhimbial aiawhte chuan Building cheithat nan ni 40 vel hun Sawrkar in a hmang a, hetih chhung hian Khawl bun chungchang ah hmalakna a awm lo hle a, a lungawi thlak tawh loh takzet a ni, an ti bawk. 

Comments

Popular News (Last 30 Days)

Serchhip DCSO sawn a ni

Bawngchawm tlang khualbuk rawktu nia hriat mi 2 man