P&E Minister in zirlai titha lawmpuina hmanpui

P&E Department changtu Minister R. Lalzirliana chuan zirna In tha tak din chhoh a nih mek laiin zirlaite hian thiamna tak tak an pawchhuak em tih chu zawhna lian tak nia a hriat thu a sawi.

St. Anthony’s Higher Secondary School, Aizawl in Academic Session 2020-21 a an zirlai HSLC leh HSSLC-a tithate lawmpuina hun nimin a Aizawl Chanmari YMA Hall-a an buatsaih a hmanpuina ah he thu hi sawiin P&E Minister chuan thiamna tak tak neih chu zirna tum ber a ni tih sawiin, Zirna In tha din chhoh zel niin, tunah phei chuan Veng tin leh khawtin ah zirna In tha tak tak a lo ding chho ta hial a, eizawnna hrang hrang kawng in hawng zelin, sawrkar hnathawh aia eizawnna tha leh thlanawm zawk tam tak a rawn chhuakchho ve ta a. Heng hna thawk tur hian finna leh thiamna tak tak neih erawh a ngai, tiin Mizoram-ah chauh nilo India leh khawvel hmun dangah pawh hna zawng hreh lo turin zirlai te hi a fuih a ni.

Minister chuan mi hlawhtling ni turin taihmakna leh tawrhchhelna neih a pawimawh thu sawiin, “Kan chawrchhuahna chu eng pawh ni rawh se, kan Future erawh chu kan kutah a awm,” a ti a, “Lehkha kan zirchhan hi enge tih hi inzawt nawn fo turin ka duh che u a, engnge nih ka tum? Ka nih tum tihlawhtling tur hian eng kawng nge ka zawh ngai tih hi inchhut nawn fo ula,” tiin zirlaite chu a fuih bawk a ni.