Hri leng mekah Mizoram dinhmun ala himlo tih sawi

COVID-19 hri leng mekah Mizoram District tin te chu Warning Level sang ber, Warning Level 4-ah la awmin kumin chhung zawng ‘All mask Campaign’ kalpui chhunzawm tura ruahman a ni.

Nimin khan Aizawl-a SAD Conference Hall-ah Health Minister Dr. R. Lalthangliana hovin State-Level Expert Committee on COVID-19 Management te chu thukhawmin Mizoram-a COVID-19 hri leng mek dinhmun an thlirho a. He hunah hian State-Level Expert Committee member te chuan Mizoram-ah nitina COVID-19 positive hmuhchhuah zat an tlahniam anga a lan rualin Positivity Rate erawh a la hniam chuang lo tih an sawi a, hei hian inthlahdah thei kan la ni lo tih a entir a, inven fimkhur kawngah tan kan lak mar that a la tul hle tih a tilang tih an sawi. WHO tehfungah Warning Level 1 atanga 4 a awm thu sawiin, Mizoram District tin te hi a sang ber, Warning Level 4-ah kan la awm vek a ni, an ti a, puipunna ah zalen lutuk thei kan la ni thei lo tih an sawi.

He thutkhawm ah hian mipui pumkhawmna hmuna a huhova zai leh ring tak taka au chu Mask vuah tha chung pawhin a him tawk lo tih khawvel hmun hrang hranga an zirchiannah tarlan an nih thu an sawi a, puipunna hi Inchhung lamah hman a nih chuan a reilo thei ang ber hman nise an duhthu sawiin, mithiamte chuan minute 30 pel lo se an duh tih an sawi tih an tarlang a, heng hmunte hi a thengthaw thei ang bera buatsaih a tul tih an sawi bawk.

Mitin kan fimkhur a tul tih an sawinaah China-ah chuan tunhnaiah case 5 vel an hmuh vangin an in lockdown rup rup a, hetiang hi keini ah chuan kan tlin ve tawh si lova, mitinin mahni mawhphurhna ah kan lak thiam vek a tul tawh tih an sawi a, Europe leh khawtlang ram tam takah hri kai an pun thar nasat avanga an buai leh tan tak thu an tarlang bawk.

COVID-19 hri kai, negative tawhte engemaw chen an inenkawl fimkhur a tul thu he hunah hian tarlan ni bawkin, an zawm tur inkaihhruaina, Post-COVID Advisory siam a tul thu leh hma lak vat an tum thu tarlan a ni a. Hri kai zingah Symptom nei lova negative leh te zingah pawh an Chuap in a tuar tih mi thenkhat ah hmuh a nih thu sawi a ni a, mipuite chu heng avanga chi-ai chuang lo tur leh fimkhur taka an nitin nunphung pangngai zawh kha a him tih an sawi bawk a ni.

He thutkhawm ah hian Meghalaya sawrkarin Mizoram COVID-19 dinhmun an rawn zawh chian thu tarlan niin, hri kai anni aiin pung mah ila, Vaccination Status leh Death Rate-ah Mizoram aiin an hniam hle a, heng vang hian Meghalaya sawrkar chuan Mizoram in hma a lak dan te leh vaccination a pawimawhzia te zirchiangin mipuite hnenah zirtirna an kalpui leh chhawng tih tarlan a ni bawk.