Mizoram-ah COVID-19 Vaccine la thei zinga za zela 90 te Vaccine Dose 1-na pek an ni tawh

Kumin January 16-a rampum-a COVID-19 vaccine pek hna kalpui a nih atangin Mizoram-ah Vaccine la thei atanga chhutin za zela 90 te chu Vaccine pek an ni tawh a, vaccine lak zawh hlima harsatna tawk AEFI (Adverse Events Following Immunization) 1561 awm tawhin an zinga 1558 te chu buaipui zui ngailo an ni.

Nimin khan sawrkar laipui-a Health and Family Welfare Minister Dr. Mansukh Mandaviya hovin India ram State leh UT zawng zawnga Health Minister te chuan biakhmuh theihna hmangin inhmuhkhawmna an nei a, he hunah hian Mizoram atanga tel Health Minister Dr. R. Lalthangliana chuan Mizoram in COVID-19 vaccine pekchhuah kawnga hma a sawn dan leh hna a thawh dan te sawiin, Prime Minister in January ni 16, 2021-a vaccine pek runpui a khuhhawn atang khan Mizoram-ah ngawrh takin vaccine pek kawngah hmalak a ni tih sawiin, November ni 10, 2021 thlengin Mizoram-ah Covishield dose 12,29,486 pek a ni tawh tih a sawi a, hri danna la thei atangin mi 7,00,373 te hnenah Dose 1-na pe tawhin za zela 90 pe tawh ang a nih thu leh mi 5,29,113 te hnenah Dose 2-na pe tawhin hei hi 1st Dose la te atanga chhutin za zela 76 vel a nih thu a sawi.

Dr. R. Lalthangliana chuan Mizoram sawrkarin Electoral Roll, 2020 behchhanin kum 18 chunglam mi 7,75,106 in vaccine la theia a chhut laiin sawrkar laipui chuan September ni 15, 2021 khan Mizoram-ah kum 18 chunglam mi 8,67,000 awm anga a rawn chhut avangin mi 91,894 laiin a inthlau tih a sawi a, hei vang hian Mizoram sawrkar data leh Ministry lam data a inmil thei lova, Mizoram in 90% hnenah First Dose pe tawh anga a chhut laiin sawrkar laipui chuan 81% angin a chhinchhiah thung tih a sawi bawk.

Mizoram-ah COVID-19 vaccine dose 15,82,680 hmuh tawh a ni a, heta tang hian Defence Forces hnenah dose 5,110 pek niin Defence Forces te hi insawnkual reng an nih vangin First Dose la tawh, Second Dose lak hmaa Mizoram pawna transfer te an awm thin a, hei hian Full Dose Coverage harsatna a thlen thu a sawi a, vaccine lak zawh hlima harsatna tawk AEFI (Adverse Events Following Immunization) te zingah mi 1558 chu Minor Case niin buaipui zui ngai an awm lova, Serious Case 3 awmin mithiam ten an chhui zui mek a ni, a ti bawk.

Health Minister chuan damlo leh harsatna dang vanga vaccine lakna hmun pan thei lo te an chenna In ah Vaccine pek an ni tih sawiin, damlo Khum-a mu mi 912 leh anmahni viltu/enkawltu mi 32 te 1st Dose pek an nih tawh thu a sawi bawk.

Comments

Popular News (Last 30 Days)

Serchhip DCSO sawn a ni

Bawngchawm tlang khualbuk rawktu nia hriat mi 2 man