Larsap in Mizoram sawrkar hmalakna a tarlang

Nimin khan New Delhi-ah Rashtrapati Bhavan-ah ‘Governors & Lt. Governors' Conference 2021’ chu neih a ni a, Mizoram atangin Governor Hari Babu Kambhampati chu telin Mizoram Sawrkar hmalakna hrang hrangte kimchang takin a tarlang.

He Conference-ah hian Union Home Minister Amit Shah chuan Palai te lawmna thu sawiin Conference hi tan a ni a. He hunah hian President Ram Nath Kovind, Vice President M. Venkaiah Naidu leh Prime Minister Narendra Modi te hnen atangin thuchah ngaihthlak a ni a. Governor leh Lt. Governor ten anmahni State Report theuh an pek hnuah ‘Best Practices at Raj Bhavan’ tih thupui zirho niin sawihona neih chhunzawm a ni bawk.

He Conference-ah hian India ram hruaitulu te hmaah Mizoram Governor Hari Babu Kambhampati chuan Mizoram hmasawnna hrang hrang leh hna kal lai te chipchiar takin a sawi a. Mizoram in COVID-19 dona kawnga hma a lakdan danglam deuh bik, LLTF/VLTF chungchang te, Kohhran, Tlawmngai pawl leh khawtlangin sawrkar an thlawp chungchang te pawh a sawilang a ni.

Hri danna pek hna pawh tha taka kalpui a nih thu te mihring nuai 12 zingah vaccine lak hmabak tlem te chauh an awm tawh thu a sawi a. Mizoram sawrkar leh World Bank ten Healthcare leh Health Infrastructure tihhmasawnna atan US Dollar 40 Million project-ah thawhhona thuthlung an ziahfel tawh chungchangte a sawi bawk a ni. Governor chuan Mizoram Sawrkar Flagship programme - Socio-Economic Development Programme (SEDP) chungchangte, Swachh Bharat Mission kalpui mek te, Kaladan Multi-Modal Transit Transport Project (KMMTTP) hnathawh mek te bakah hmalakna langsar zual te a tarlang a ni.