LPS Fight Night 2 khuh hawnna nei

LPS Fight Night 2 chu November 27, 2021 khian Dawrpui Multipurpose Hall, Aizawl-ah neih a ni dawn a, NT. Lalbiakkima chuan Mizoram leilungah professional boxing a khel dawn a ni.

LPS Fight Night2 neih tur chungchangah hian nimin khan Sports Minister Robert Romawia Royte hovin LPS neitu Lalsawmliana Pachuau bakah Main Event-a inhnek tur NT. Lalbiakkima leh mi pawimawh dang ten Sports Minister Pisa-ah Media an kawm a. He hunah hian Sports Minister chuan chuan LPS chhungkuate, Boxing Promoter te, Coach te, infiammi te leh Mizoram mipuite zarah Mizoram Boxer ten tun dinhmun an thleng thei leh a tum hnihna atan Mizoram chhung ngeiah Professional Fight neih a ni leh tur chu lawmawm a tih thu a sawi a ni.

International Boxing Association (IBA), USA leh Professional Boxing Commission, India phalna angin LPS Boxing Promotion leh Marine Pro Boxing Promotions bultumin LPS Fight Night 2 hi buatsaih a ni dawn a. IBA Intercontinental Title kawltu NT. Lalbiakkima leh Thailand boxer Gerttipong Kumsahwat te inhnek chu Main Event a ni ang a. Anni bakah hian Vanlalawmpuia, Laldingliana, F. Zoramchhana, C. Lalhruai-tluanga, HC. Lalramfela leh H.Lalrinhlua te chuan India ram State hrang hrang atanga lo kal Professional Boxer dangte an hnek bawk ang.

Main Event-a inhnek tur NT. Lalbiakkima chuan LPS Fight Night 2 atana a inbuatsaih nasat thu leh a fitness a that tawk thu sawiin, Round 10 inhnek tur ni mahse Round 5-na ah kingpui tur Gerttipong Kumsahwat hi a hnek tluk theih a rin thu a sawi bawk.

He Event-ah hian Ring Official chu Professional Boxing Commission an ni anga, Doctor chu Mizoram chhunga mi hman a ni ang. COVID-19 avangin mipui nawlpui hnenah inhnek enna Ticket hralh a ni dawn lo a. Pay Per View chi hnih a pekchhuah a ni thung ang. LPS Vision pawttute hnenah Cable PPV Home Unit khat Rs. 60 a hralhchhuah tur a ni a. Smartphone app, Chhimbal kaltlangin Unit khat Rs. 100+Tax pein khawvel khawi hmun atang pawhin a en theih dawn a ni.

LPS Vision Fight Night 2 senso zawng zawng hi LPS Vision-in a tum anga. He Event atana Boxer leh Official Mizoram pawn atanga lo kal turte kalna, hawna leh an cham chhunga an senso zawng zawng bakah hlawh thlengin LPS Vision in a tum dawn a. Thailand boxer Kumsahwat leh NT. Lalbiakkima te hian US Dollar 1500 ve ve an hlawh dawn a. Main Event nilo zawng hian an chak chuan Rs. 30,000/- an hlawh anga, an chak loh chuan Rs. 20,000/- an hlawh bawk ang.

Comments

Popular News (Last 30 Days)

Serchhip DCSO sawn a ni