Inclusive Education chungchang zirhona nei; Serchhip District-ah CWSN 164 an awm mek

SAMAGRA Shiksha Serchhip District buatsaih zirna In-a thawktute leh zirlai nu leh pa te tan Huapzo zirna, Inclusive Education chungchang zirhona chu nimin khan neih tan niin Vawiin hian chhunzawma zawhfel a ni ang.

Block Resource Centre (BRC) Hall, Serchhip-a he training neih hi Serchhip District Education Officer, B. Zohmangaihi chuan hmanpuiin Inclusive Education an kalpui mek hnuaiah hian naupang School kai rual zawng zawng ten an School an kai vek theihna tura hma an lakna te a sawi a. He hmalakna hnuaiah hian kum 2022-2022 kan hman mekah Serchhip District chhungah naupang ngaihsak ngai zual bik, Children With Special Needs (CWSN) Higher Secondary-ah 23 leh Elementary School-ah 141 an awm thu sawiin, heng mite hi Sports Events te neihpui thin an nih thu leh hri leng avangin nikum leh kumin ah erawh neih theih a nih lo thu sawiin, December 3-ah World Disabled Day pawh hmanpui thin an ni tih a sawi a. Heng zirlai naupangte tan hian Wheelchairs leh Crutches te dil theih a nih thu pawh sawiin, CRCC ten an enfiah hnuah pek an nih tur thu a sawi bawk.

Hei bakah hian Serchhip DEO chuan zirlai naupangte tana hma an lakna leh hamthatna awm thei hrang hrang te tarlangin, Zirlai naupangte tan Assessment Camp buatsaih thin a nih thu leh zirlai naupangte zingah Bengdar leh Tarmit te a mamawh te hnenah an sem thin thu a sawi a. Mahni a School kal theilo leh puak ngai te tan Escort Allowance thla 10 atan Rs. 4000/- leh naupang School kalna hla te tan Transport Allowance chu thla 10 atan Rs. 4000/- dil a pek theih a nih thu a sawi a. Kum 2020-2021 chhung khan CWSN hnuaiah Hmeichhe naupang zirlai 48 te chu Stipend Rs. 2000/- theuh pek an nih thu a sawi bawk.

Inclusive Education chungchang zirhona nimin a neih ah hian Elementary School-a Zirtirtute leh zirlai nu leh pa thenkhat te telin Vawiin hian a hmun ngaiah Secondary School zirtirtu tan neih leh a ni dawn a. He hunah hian District Project Office-a Special Educator R. Laldampuii leh Asst. Programme Officer (IE) C. Lianbuangi te Resource Person atan hman niin anni hian he huna tel te hi zirtirna an pe a. Naupang zawng zawng ten zirna an dawn vek theihna tura sawrkar laipui in hma a lo lak tawh dan te, rilru leh taksa a rualbanlohna nei ten zirna an dawn ve theihna tura sawrkar hmalakna te leh hemi kawnga hmalak zel dan tur te zirho a ni.