Hri kai 32 hmuh belh leh

Nimin khan Serchhip District-ah COVID-19 hri kai mi 32 hmuh belh niin mi 76 enkawl dam an ni a, Serchhip District-a hri kai zingah mi 13 lai an boral tawh thung.

Nimin khan hriat theih chinah Serchhip District-ah hri kai mi 32 lai hmuh belh an awm a, an zinga 8 hi Chhiah-tlang mi niin New Serchhip-ah 6, Thenzawl-ah 3 leh Thentlang-ah 1 hmuh niin a bak hi hriat chian theih a ni rih lo. Niminpiah khan Serchhip District-a True-Nat Laboratory-a Sample enfiah atangin hri kai mi 5 hmuh ni bawkin an zinga mi 4 te chu New Serchhip ami niin Thenzawl atangin hri kai mi pakhat hmuh a ni a, Rapid Antigen Test hmanga hri kai nimin-a kan rawn tarlan tawh bakah Kanghmun South atangin hri kai mi 16 hmuh belh an awm bawk a ni.

Hetihlai hian hri kai zing ami, Tumsanga (86), Serchhip Hmar Veng chu nimin chhun dar 12:15 khan COVID-19 vangin a boral ve leh a. Tumsanga hian Oct. 25, 2021 khan hri a kai tih hmuhchhuah niin hemi ni vek hian Serchhip DCHC-ah dahluh niin natna dang nei tel a ni. Hemi hma nizan hmasa khan C. Hmangaihzuala (71), Thenzawl chu COVID-19 vangin ZMC-ah a boral ve bawk a, Oct. 13 khan hri a kai tih hmuh-chhuah niin Oct. 19-ah ZMC-ah dahluh a ni.

Serchhip District-a hri kai enkawl zingah nimin khan mi 75 enkawl dam an ni ve leh thung a, heti hian nizan thleng khan Serchhip District-a hri kai hmuhchhuah chu 4426 niin an zinga 3886 te chu enkawl dam an ni tawh a, hri kai enkawllai 527 la awmin hri kai zingah mi 13 an boral tawh a ni.