HRD Board leh MITS thawhdunna tur ziakfel

Mizoram sawrkar-a Human Resource Development Board leh Mizoram Information Technology Society (MITS) te chuan nimin khan thawhdunna tur thuthlung an ziak.

He thawhhona thuthlung hi nimin khan HRDB Vice Chairman L. Thangmawia Office-ah ziakin Mizoram sawrkar aiawhin Human Resource Development Board Vice Chairman L. Thangmawia MLA, School Education Director James Lalrinchhana, SCERT Director Laldawngliani Chawngthu, MBSE Secretary Lalthangbika, Samagra Shiksha State Project Director Lalhmachhuana ten hming an ziak a, Mizoram Information Technology Society (MITS) aiawhin an President Dr. C. Lalnuntluanga leh General Secretary C. Lalrinawma ten hming an ziak ve bawk a ni.

Thawhhona thuthlung-ah hian Mizoram-a zirna tihhmasawn nan, ICT kaihhnawih hmalakna ah MITS leh School Education Department hnuaia peng hrang hrang te a remchan dan ang zela an thawhho thin tur thu te, Project leh programme sawrkarin ICT kaihhnawiha a siam, MITS mamawhna a neih apiangah a tul anga sawiho a, mumal taka inbiakna neiin thawhho dan tur duan thin te, ICT tangkai zawka zirna lama hman dan tur kawngah MITS in Mizoram sawrkar-ah HRD Board kaltlanga rawtna a thlen theih tur thu te tarlan a ni a. Thawhhona hi thuthlung ziah ni atanga chhiara kum khat (1) chhung huam tur a ni anga, a tul anga ennawn zel theih a ni ang.

He hunah hian HRD Board Vice Chairman L. Thangmawia chuan zirna lama Zoram in hma a sawn theihna tura MITS nen an thawkho thei tur chu lawmawm a tih thu a sawi a, National Education Policy, 2020 hian Information Technology (IT) hman tangkai a ngai pawimawh em em tih sawiin, NEP, 2020 lo zirchianga IT hman tangkaina tur rawtna siam turin MITS leh Official kalkhawmte a chah a. MITS President Dr. C. Lalnuntluanga pawhin IT hmang tangkaia zirtirtute training mumal taka pek dan turte, Mizo Tawng tihchangtlun kawngah te theih ang angin hma an lo lak tawh thin thu te a sawi bawk.

Nimin-a thuthlung ziahna hunah hian Zirtirtu leh zirlaiten an chhawr tangkai theih tur, online hmanga an zirlai leh a kaihhnawih thil awlsam taka an hmuh leh dah theihna tur ORSEM (Open Repository of School Education Mizoram) siam dan turte, School hrang hrang ten awlsam leh tangkai zawka ICT an hman theihna tur ruahmanna tha siam chungchangte leh thil pawimawh chi hrang hrang an sawiho bawk a, Science Teachers’ Association Mizoram (STAM) Vice President Lalhmukina pawhin Science zirna kawga IT hman tangkai dan tur ruahmanna an siam te a sawifiah bawk.