Chuap leh Kal lam enkawlna hmun tur bik hawn a ni

Civil Hospital Aizawl OPD building chhawng chunga bera siam Kal lam enna leh Chuap lam bik enna hmun chu nimin khan Health & Family Welfare Board Vice Chairman Dr. ZR. Thiamsanga MLA chuan a hawng.

Heng OPD pahnih hawngtu Dr. ZR. Thiamsanga chuan Medical Science-ah Mizote kan chhuanawm thu sawiin, Super Specialist te kan nei chho ta zel chu a lawmawm tih a sawi a, “Mizoram sawrkar tan pawh tih tur a awm a, hnathawk theia kan Super Specialist te kan siam hi sawrkar mawhphurhna a ni,” a ti a. Kal thlak (Kidney transplant) ah ringawt kum 5 kalta chhung khan State sawrkar chuan cheng vbc. 28 a hmang tih he hunah hian sawiin, Mizoram-a Kal thlak ve theih tawh nan inbuatsaih a tul hle tih a sawi bawk.

Nimin-a hawn tak Kal lam enna, Nephrology hi Super Specialist Dr. C. Malsawmkima'n a enkawl dawn a. Kal natna chi hrang hrang, Zun kawng hnai, Protein leak leh Thî, Thisen sâng a bikin khuahkhirh harsa leh kum la naupang Thisen sang chhuichian ngai, Kal thlak (transplant) tura buatsaih leh enkawl zui, Zunthlum vanga Kal chhia, Autoimmune disease (SLE adt), Kal natna hriatchian nana Biopsy lak bakah Dialysis chi hnih - Hemodialysis leh Peritoneal Dialysis te enkawlna a ni a. Nephrology OPD hi Thawhtanni, Nilaini leh Zirtawpni-ah te hawn tur a ni.

Chuap lam enna, Respiratory Medicine hi Dr. Don Sapremsanga Halliday chuan a enkawl dawn a. Chuap leh Awm natna chi hrang hrang, Thawhah, Khuh, Awmchhung na, Hritlang adt; Pneumonia, Asthma, TB, Chuap-a tui tling leh hnài awm, Chuap Cancer leh Chuap natna chi hrang hrang zawnchhuahna lam tihna hmun tur a ni a. Thawhtanni, Nilaini, Ningani leh Inrinni-ah Respiratory Medicine OPD hi hawn a ni ang.