Health Minister hovin District hrang hrang ten hri leng dona chungchang an sawiho

Health Minister Dr. R. Lalthangliana hovin nimin khan District tina Deputy Commissioner te, Chief Medical Officer (CMO) te leh District Information & Public Relations Officer (DIPRO) te chuan All Mask Campaign kalpui mek chungchang leh COVID-19 dinhmun sawihona neih a ni.

Biakhmuhtheihna hmanga he sawihona hunah hian Health Minister Dr. R. Lalthangliana chuan COVID-19 dona kawnga hmalakna chi hrang hrang sawrkarin a ruahman thinah District tina Bawrhsap te leh DIPRO ten Health Department hmalakna tha taka an thlawp thin avanga lawmthu sawiin, Hmai tuamna vuah tura beihpuithlakna, All Mask Campaign chungchanga an hmalakna ah lawm thu a sawi a. “State Level Expert Team on COVID-19 Management ten kan dinhmun thlirin Mask vuah tura inzirtirna chu ngawrh lehzuala kalpui a la tul an ti a, hei vang hian All Mask Campaign hman lai mek pawh thla khat zet kan kalpui tawh hnuah November ni 15, 2021 thleng kan pawtsei leh a, hetih chhung hian ngawrh lehzuala mask vuah a him zia kan inzirtir a tul dawn a ni,” a ti a. Vaccine chungchangah pawh District hotuten thahnem n ngaihpuina zarah India ramah a titha ber pawl kan ni tih a sawi bawk.

He thutkhawm ah hian District tin atangin DC, CMO leh DIPRO ten an hmalak dan hrang hrang an tarlang a, report tlangpui khaikhawmna ah chuan All Mask Campaign ngawrh taka an kalpui vang leh mipuite pawhin fimkhur nachang an hriat deuh deuh avangin tun dinhmunah chuan hri kai hmuhchhuah thar zat pawh an tlahniam zel a, thingtlang lamah pawh nasa lehzuala beihpui thlak niin a tlangpuiin hmalakna a hlawhtling hle a ni.

All Mask Campaign beihpui thlaknaah VLTF leh LLTF ten tha taka an thawhpui thu tarlan a ni a, vantlang aurinna hmangte leh khawpui lun laia Poster/Banner tarte, Print leh Electronic Media kaltlanga mipuite zirtirna neih a nih baka District thenkhatah chuan COVID-19 No Tolerance Week te an nei a ni bawk.

COVID-19 Vaccination programme pawh District tinah tluang taka kalpui a nih thu tarlan a nih rualin chhuanlam hrang hrang nei a Vaccine la duhlo te rilru hneh erawh theihtawp an chhuah chungin a har hle tih tarlan a ni a. Raltlan lo mikhualtu District te chuan heng raltlante hi vaccine pek vek tuma hma an lak mek thu an sawi bawk a ni.