Chanchin thar thenkhat :

PAHOSS hmalakna thlirho

Parking House Committee chu nimin khan a tum 5-na atan Chief Minister Zoramthanga hovin CM Conference Hall-ah PAHOSS (Parking House Support Scheme) hmalakna hrang hrang thlirho leh ngaihtuah tur pawimawhte sawiho in an thukhawm a, PAHOSS inkaihhruaina ennawn niin, belh ngai leh siamthat ngai te sawiho a pawm a ni a. Vice Chairman atan UD&PA changtu Deputy Chief Minister dah tura rawtna lut chu pawm a ni bawk. February ni 6, 2019-a PAHOSS tlangzarh a nih atang khan UD&PA Department in dilna 1458 hmu tawhin, chung zinga 403 chu beneficiary tura thlan an ni a. Puihna hmu zingah mi 11 in an sa zo tawh a, Scheme atanga inhnukdawk 26 an awm thung. 

Khawzawl DC in tlawh

Khawzawl District Bawrhsap CC. Lalchhuang-kima chuan niminpiah khan an District chhunga Biate, Sialhawk leh Khawhai khua te tlawhin, heng khuaa hmasawnna kawnga hmalak dan tur khawtlang hruaitute sawipuiin a hmunah a enpui a. Biate-a thingpui huan hlawk zawka kalpui a nih theih dan tur te, Biate CHC leh Biate tlang a Nature Camp siam tura ruahmanna awm mek te, Sialhawk khuaa Lakhuihthei chingtu ten awlsam zawk leh hlawk zawka an hralhchhuah theih dan tur te, PHC leh Hlipad hmun tur te leh Khawhai tlang langsar zawka phochhuah leh hlawk zawka kalpui a nih theih nana hmalak dan turte khaw-tlang hruaitute nen an sawiho bawk a ni.

YMA Gen. Conf. nei dawn

Central YMA rorelna sang, Central Coordination Committee (CCC) nimin-a Aizawl a thukhawm chuan kumin-a YMA General Conference vawi 73-na chu Bilkhawthlir-ah neih theih a nih dawn loh avangin kumin chhung ngeiin Central YMA thlen turin Aizawl-ah neih nise an ti a, a tul angin CEC in hma lo la se an ti a ni. Kumin hian YMA General Conference hi ni khat neih tura ruahman niin CCC Meeting hian Conference Agenda tur pawh an thlifim nghal a ni.

Padma Shree hlan leh

India ram-a Civil mite chawimawina sang, Padma Award dawng tura thlan, B. Sangkhumi chuan niminpiah khan India  President Ram Nath Kovind hnen atangin Padma Shree Award a dawng. Kumin hian India rama mi 119 te hnenah Padma Award hi hlan tur niin nikum lama hri leng vanga sem theihloh te sem a nih hnuah niminpiah khan kumin-a he Award dawng turte hi hlan ve leh an ni a, Mizoram atangin MHIP General Hqrs. President hlui leh MPSC Chairperson hlui B. Sangkhumi chu hlan niin khawtlang rawngbawlna, a bikin hmei-chhia te chawikanna leh hmeichhe rahbi tleu te dinhmun siamthat kawnga a thawh hlawk avanga hlan a ni.

CADC-a EM tur mi 7 lalut

Chakma Autonomous District Council-a CEM Rasik Mohan Chakma kaihhruai sawrkar a din hnuah Executive Member tur mi 7 te chu nimin khan Kamalanagar-a CADC Art & Culture Hall-ah Chawngte Civil SDO, Dr. Manesia Khaimeichho chuan rinawmna thu tiam tirin a lalut. CADC-ah hian CEM Durjya Dhan Chakma chu thla hmasa, Oct. 3, 2021 khan a ban avangin sawrkar dinglai chu thiah a ni a, MNF Legislature Party chuan an hruaitu atan atan Rasik Mohan Chakma hi thlangin Oct. 14 khan CEM atan lakluh a ni a, nimin khan Executive Member lakluh an ni leh ta a ni.