Chanchin thar thenkhat :

Raltlan tanpuina semchhuak

Hnahthial District Raltlan Committee chuan nimin khan an District chhung khaw hrang hrang ah nimin khan raltlan tanpuina an semchhuak a, nimin-a tanpuina an semchhuah te hi Buhfai bag 140, Thawmhnaw ip 50 leh Mutbu bag 30 niin Thingsai, Bualpui, Ngharchhip leh N. Nghar-chhip-ah LPK 2 in an thawn a, heng bakah hian Hnahthial khawpui chhung, Tuipui leh Mual-lianpuiah te tanpuina hi an pe mek bawk. Nimin thleng khan Hnahthial District-ah hian Myanmar atanga raltlan rawn lut 2107 an awm mek a, an zingah hian chhungkua 407 awmin khaw hrang hrang 12-ah raltlan hi an rawn lut a ni.

Transport Minister in tlawh

Champhai South Bialtu MLA leh Transport Minister TJ. Lalnuntluanga chuan tunhnaia ruah sur nasa in Champhai leilet phaizawl-a har-satna hrang hrang a thlente chu nimin zing khan a hmunah kalin a tlawh a. Heng harsatna thleng te hi pawi a tih thu sawiin, khuarel leh mihring siam chhiatna thleng thin dangte chu inzirthar nan leh hmasawnna kawng kawhhmuhtu atana hman nise a duh thu a sawi a, pumpelh emaw, tihnep emaw a nih theih nana tanlak a tul thu a sawi bawk.

MYC in Vawk vulh zirna buatsaih

Mizoram Youth Commission (MYC)-in thalai, phai lama hna thawka awm, COVID-19 hri leng vanga Mizoram-a lo haw, hna thawh tur mamawhte'n eizawnna an neih theih nana thiam thil chi hrang hrang zirtirna (training) a ruahman zinga Lawngtlai District-a Vawk vulh dan zirna ni 15 awh tur chu nimin khan neih tan a ni a. He training tel tur hian mi 20 thlan niin AH&Vety Department-a mithiam hrang hrang ten zirtirna an pe dawn a ni.

Bialtu MLA in lawmpui

Tunhnaia India President hnen atanga Padma Shri dawngtu C. Kamlova Salem Veng, Aizawl chu Aizawl South-II MLA Lalchhuanthanga chuan lawmpuina hlanin an bial chhunga hetiang mi chhuan-awm an awm chu lawmawm a tih thu a sawi.

Inthlan hmachhawn dan zirho

PC Party chuan nimin khan Aizawl-a an Office-ah SWOT Analysis (Strength, Weakness, Opportunities, Threats) hmangin 2023 General Election hmachhawn dan tur an zirho a. He hunah hian an Party Senior Vice President Vanlalruata chuan Mizoram sawrkar chu kan ram leh hnam mamawh bulpui chi hrang hrang ngai pawimawh tur te, ramri chungchang te, buh leh bala intodelh tur te, kawlphetha leh tui thianghlim-a intodelh tu leh thalaite tana eizawnna siam tur leh mipui nawlpui harsatna sukianga, eirukna do kawngah te tun aia huaisen leh chak zawka ke pen tur an duh thu a sawi bawk.

Union Minister-ah thlen

BJP Mizoram Pradesh State Vice President JB. Rualchhinga leh hruaitu dang te chuan niminpiah khan DONER Minister G. Kishan Reddy chu hmuin Mizoram-ah thalai hnathawh tur nei lo tam tak an awm avangin Mizoram a thalai ten hnathawh tur an neih theihna turin a puihna an dil bakah, thalai hnathawhtur neilo tam tak ten hnathawh tur an neihna turin Skill Development leh Tourism lamah hma lakpui turin an ngen a. Union Minister chuan Building Infrastructure ringawt a tawk tawh lo tih sawiin, thalai te hmakhua thlir chunga State Sawrkar ten ngaihtuahna tak tak an sen a ngai tih a sawi bawk.

Ration Kit semchhuak

Aizawl District in Akshaya Patra, Mumbai atanga Ration Kit a dawn te chu nimin khan an District chhunga De-addiction Centre leh Children's Home hrang hrang a semchhuah turin Aizawl DC chuan Vanlalhruaii, Field Staff, MSD&RB hnenah a hlan a. Heng te hi De-addiction Centre 24 leh Children's Home 20-ah te hlan leh a ni dawn a ni.