MPF leh Candidate ten inkawmna hun an nei

October 30, 2021-a Tuirial bial bye-election lo awm tura party hrang hrang candidate te leh Mizoram People Forum (MPF) Gen. Hqrs hruaitute chuan nimin khan inkawmna an nei.

Synod Committee Room, Aizawl-a inkawmna ah hian Candidate pali te tel kim theiin he hun hi Rev. K. Lalrinmawia, Vice President, MPF Gen. Hqrs in a kaihruai a. Rev R. Lalnuntluanga, Gen. Secretary, MPF in inthlanna fel fai leh thianghlim a awm theihna tura an hmalakna hrang hrang tarlangin, MPF hruaitu dangte pawhin MPF duhdan leh ngaih pawimawhte bakah candidate ngenna thenkhat an sawi.

MPF in candidate te chu an thawhhona thuthlung te zawm theuh tur leh sum leh pai, therhlo hmanga vote zawng lo tur te, vote zawn nana a thlawna mipuite thiltih sak- buh phur sak, ration buhfai a thlawna sem, pawisa sem etc. te ti lo tur te, Election Commission of India (ECI) in sum sen a phal zat aia sang hmang lo tur leh vote thlak tur lirthei hmanga phurkhawm lo tur leh senso tum sak lo tur te, party flag te danin a phal bak tar lo tur leh mahni party worker leh unit/block te pawh MPF duhdan leh thawhhona thuthlung te lo hrilhfiah a, venpui turin leh thil tihhlawhtlin theih loh tur intiam leh intiamkamna chi reng reng ti lo turin an ngen a ni.

He hunah hian Candidate te pawhin inkawmhona hun buatsaih chu lawmawm an tih thu an sawi a. Candidate te hian MPF hruaitute hnenah an campaign dan chungchangah MPF ten uluk taka ven pui tur te, MPF te khauh deuh zawka hmala tur ten an ngen a. Party leh MPF thawhhona thuthlung tha taka zawm a nih theihnan candidate te hian theihtawp chhuah an tum thu an sawi bawk.