COVID-19 hri danna la thei chin zawng ten hri danna la vek turin Serchhip CMO in a sawm

Serchhip District Chief Medical Officer Dr. Laldawngliana Sailo chuan COVID-19 chu theihtawp chhuaha kan do chung pawha kan do hnehloh a ni tih sawiin, chumi dona hmanraw pawimawh tak chu hri danna laka ni tih a sawi a, hri danna la thei chin te chu la vek turin a sawm bawk.

India ram mipui vbc. 100 ten COVID-19 Vaccine an lak lawmna puala inkhawm tawi nimin-a Serchhip CMO Office tual-a neih ah he thu hi sawiin Serchhip CMO chuan India ramah mipui ten COVID-19 Vaccine kan la tha hle tih sawiin, Mizoram-ah phei chuan nausen kan nih lai atanga hri danna la thang kan nih avangin hri danna hi kan la tha hle tih a sawi a. COVID-19 chu theihtawp chhuaha kan do chung pawha kan do hnehloh a ni tih sawiin, chumi dona hmanraw pawimawh tak chu hri danna lak hi a nih thu leh a thlawna Vawiin thlenga lak theih a ni chu thil vanneihthlak a ni tih a sawi a. COVID-19 Vaccine chuan hri lakah za-a za min veng lo tih pawh sawiin, amaherawh chu kan taksa in hri a lo dolet theihna tura kan taksa lo buatsaihna a ni, a ti a. Mithiam ten an zirchianna ah hri danna la te chuan he hri hi lo kai mah se hri danna la lo te aia an lak nat loh thu leh zaa 80 te phei chu damdawi In ah pawh enkawl ngailo an ni tih a sawi a. Hei vang hian hri danna la thei zingah la la lo te chu la theuh turin a sawm bawk.

Serchhip CMO chuan hri kai hmuhchhuah an la pun mek zel thu pawh sawiin, hemi avanga hri leng dona kawnga beidawng mai tur kan nih loh thu leh theihtawp kan chhuah zel a tul thu a sawi a. Hri leng laka kan him theih nan vaccine kan lak bakah Covid Appropriate Behaviour (CAB) kan zawm that a pawimawh thu sawiin, hmai tuamna hman that te, midang nen-a inhnaih loh leh kut silfai te chu ngaih pawimawh a tul thu a sawi bawk.

Nimin a he hun hman hi Serchhip District Surveillance Officer, Dr. Lalngaihawmi Chhangte chuan kaihruaiin India ramah kumin January 16 atanga COVID-19 hi a thlawna pek tan a nih thu leh Serchhip District pawhin nasa takin tha kan thawh ve a ni tih lantirna atana he hun hi hman a nih thu a sawi a. Hemi atana thawktu Vaccine petute, Vaccine la zawng zawng leh vaccine lak a nih theihna tura thawktute zawng zawng chungah lawmthu a sawi bawk.

100 Crore Vaccination Celebration-ah hian Serchhip District a hri danna lak kawnga midangte tana entawntlak thlanchhuah mi 4 hnenah chawimawina leh lawmpuina hlan an ni a, heng mite hi kum upa atangin Thangzuala (94), Serchhip Vengchung; Naupai chunga Vaccine la zingah H. Lalbiaknii, New Serchhip; natna khirh bik nei zingah Lalthlamuana, New Serchhip leh Frontline Workers zingah Lalchungnunga, Bazar Veng te an ni a. COVID-19 hri danna la, mahni thlalak thehluh theih hun chhunga thlalak thehlut zinga vannei thlanchhuah mi pathum te hnenah lawmman hlan an ni bawk.