Mizoram District hrang hrangah Oxygen siamchhuahna khawl a ruala hawn a ni

PM-CARES kaltlanga ramchhung State hrang hranga PSA Oxygen Plant hawn rualin nimin khan Mizoram-ah pawh District hrang hrangah Oxygen Plant hi hawn a ni.

Chief Minister Zoramthanga chuan nimin khan Mizoram State Cancer Institute, Zemabawk-ah minute khat-a Oxygen litre 1000 siam thei tur hi a hawng a, Chief Minister chuan Oxygen Plant tha tak State Cancer Institute-ah leh Mizoram hmun hrang hrangah hawn a ni chu lawmawm a tih thu sawiin, tunlai COVID-19 hri leng avang mai bakah natna hrang hrang avanga damlo te tan Oxygen an mamawh khawp pek mai tur awlsam taka siamna tur Hospital-ah kan nei ta chu hlu a tih thu a sawi a ni.

PM-CARES hnuaia Mizoram sawrkarin a dawn vek 1000 LPM Oxygen Plant, SRHF-ZMC a mi chu AMC Mayor Lalrinenga Sailo chuan hawngin RD Minister Lalruatkima pawhin DCHC, Kulikawn Hospital, Aizawl-ah PSA Oxygen Plant hi a hawng a. P&E Minister R. Lalzirliana chuan Saitual District Hospital-ah 250 LPM PSA Oxygen Plant hi a hawng bawk a ni.

Champhai-ah pawh 500 LPM PSA Oxygen Plant chu Health & Family Welfare Board Vice Chairman Dr. ZR Thiamsanga MLA chuan nimin khan a hawng a, he hunah hian Dr. ZR. Thiamsanga chuan Mizoram pum ang pawha ni chhinchhiahtlak a nih thu sawiin, Champhai District-in a mamawh em em RT-PCR bunna tur hmunhma chei dan tur peihfel a nih tawh thu he hunah hian a sawi bawk a. Khawzawl-ah pawh District Bawrhsap CC. Lalchhuangkima chuan Oxygen Plant hi a hawng a ni.

Mamit-ah pawh PSA Oxygen Plant bun thar hi District Bawrhsap Dr. Lalrozama chuan hawngin Hnahthial-ah pawh Addl. DC, Saizikpui chuan a hawng a, Lawngtlai-ah pawh Lai Autonomous District Council-a Chief Executive Member (CEM), V. Zirsanga hovin PSA Oxygen Plant hawnna inkhawm hi Lawngtlai District Hospital-ah neih niin hmanraw pawimawh leh tangkai tak takte chu District hnufual, Lawngtlai District tan a hlu zual tih a sawi. Siaha-ah pawh Siaha District Hospital bakah Siaha District PHC te chawmtu tur PSA Oxygen Plant chu nimin khan Siaha District Addl. DC Abraham Beirazi Khithie chuan a hawng a, Kolasib-ah pawh District Bawrhsap Dr. H. Lalthlangliana chuan District Hospital-ah PSA Oxygen Plant hi a hawng a ni. Hetihlai hian Civil Hospital, Lunglei-a hman tur Oxygen Plant erawh bun fel ni tawh mah se khawl lamah fel tawklo a awm avangin hawn theih a ni lo thung a ni.